E siman aki den prensa Minister Eman a indica cu Gobierno a haci entrega oficial di e presupuesto 2014 na Parlamento di Aruba, pero te ainda e documento aki ta spoorloos ya cu e no a yega Parlamento. Mirando e tardanza formal cu ya caba tin, ta na su lugar pa Ministernan Eman y Bermudez splica Pueblo dicon e Presupuesto 2014 ainda no a yega Parlamento.

Nos a yega mitar di november 2014 y ainda nos Pais no a conoce un presupuesto pa 2014. Ta conoci cu despues cu e rapport di CFT a keda cla, Gabinete Eman mester a haci cambio na e concepto di presupuesto cu a keda presenta y trata den Parlamento di Aruba. Segun Minister Eman a informa e siman aki, e cambionan a keda haci den e presupuesto y esaki a keda entrega na Parlamento pendiente e tratamento den reunion publico. Segun e mandatario, e cambionan haci por wordo carga pa Reino Hulandes sugeriendo cu Gabinete Eman lo a cumpli cabalmente cu e sugerencianan di CFT. Pero Parlamento mes no a recibi ningun presupuesto for di man di Minister Bermudez y aki ta na unda e preguntanan ta surgi, dicon e Presupuesto 2014 no a yega Parlamento di Aruba ainda? Kiko a bay robes atrobe entre Hulanda y Gabinete Eman? Acaso toch Gabinete Eman no a cumpli cu e recomendacionnan di CFT? Nos mester spera otro escalacion cu Hulanda?

Lo ta bon si pa e siman aki ainda Ministernan Eman y Bermudez sali splica Pueblo kiko a pasa cu e Presupuesto 2014 no a wordo entrega na Parlamento manera cu Minister Eman a trece dilanti. Ya Pueblo ta basta confundi caba y mester haya claridad riba kiko ta pasando cu tin tanto tardansa asina cu e presupuesto pa 2014.

11 november 2011

Expresionnan haci den e articulo aki no necesariamente ta refleha opinion di ArenaPoliti.co