E ta conoci cu partido AVP a gana eleccion na 2009 bisando cu nan lo elemina BBO. Tur tempo Minister Eman a bisa den Pueblo cu ta BBO ta e problema di nos Pais y pesey a cuminsa na reduci e BBO na 1,5% pa despues elimine completamente. Awe Pueblo sa mihor cu no ta BBO ta e problema di nos Pais, ya cu su reduccion no a ni wordo sinti den Pueblo. Nada no a baha den prijs toch. Ta un simpel enganio e tabata pa AVP por a yega y keda na poder. Pero awe cu Gabinete Eman a haci deshaci cu fondo publico y cu tin mester placa pa entre otro e fondo di AZV, e mesun Gabinete Eman y e mesun Minister Eman ta hisa BBO na 2,5%. Tristo ta cu esaki no lo ta e ultimo subida di BBO. Ainda falta, ya cu si nos lesa e rapport di CFT nan ta indica cu BBO lo mester wordo subi na por lo menos 4,5%. Mester remarca cu e subida di BBO aki su so no lo yuda pa drecha e situacion financiero. Banda di esaki lo mester introduci mas medida pa asina nos Pais por recupera di e danio financiero di Gabinete Eman. Ta hopi tristo cu pa capricho y puramente pa haci wega politico a core mishi cu BBO y dania nos finanzas publico te na e extremo cu awe nos a haya un KB, supervicion financiero di CFT y un cantidad di medida riba lomba di Pueblo. Si no a mishi cu BBO awe Pueblo no mester a wordo castiga cu tanto medida.