E ta conoci y den rapport di CFT a keda documenta cu Gabinete Eman den 4 aña a redobla e debe cu nos Pais a acumula den 23 aña di tempo. Gastonan a sigi crece y placa no a wordo destina den proyectonan cu ta crea cupo di trabou y cu na su turno ta engrandese nos economia pa trece entrada den caha di Gobierno. Pesey awe cu Hulanda a pone un paro na e fiamento pa loco, Gabinete Eman ta deshaci di tur garantia di Gobierno pa resta placa pa nan por sigi malgasta.

AZV
Asina nos ta haya cu diripiente mester hisa BBO pa paga pa e fondo di AZV ya cu Gabinete Eman no tin placa mas pa cumpli cu e garantia di Gobierno pa cubri e deficit di e fondo y no por bende politicamente cu lo bolbe subi e prima di AZV. Tanto cu AVP a demonisa BBO, awe ta hisa BBO bek. Pero pa pinte bunita ta yame Health Tax pa Pueblo no ripara cu ta BBO a wordo subi pa Minister Eman despues cu e mes a gana eleccion bisando cu elo elemina BBO. Ta con porta cu promer cu eleccion dirigentenan di AZV ta splica cu tur cos ta bayendo bon cu e fondo y awor despues di un aña ata cos ta asina malo cu mester cobra extra BBO? Ta bisto cu Gabinete Eman kier paga menos posibel na AZV y ta prefera di cobra extra BBO pa cubri e gastonan di e fondo di AZV.

APFA
Otro gasto grandi di Gobierno ta e pensioen di APFA. Pesey Gabinete Eman a zorg pa baha su gasto di pensioen door di hisa edad di pensioen, corta den pensioen, hisa e franchise y perhudica e pensionado di APFA door di kita tur suma extra cu nan ta haya pa yuda nan cu e costo halto di bida. Di e manera aki Gabinete Eman ta paga menos na pensioen y por resta placa pa paga pa proyecto pa yuda amigo y sponser di campania.

SVB
E garantia cu Gobierno mester cumpli cune pa fondonan maneha pa SVB tambe lo wordo limita. Asina Gabinete Eman ta forza un despensacion (kwijtschelding) di mas di 57 miyon florin di debe na fondonan maneha pa SVB. Asina mes cu poco tempo atras a hisa edad di pensioen di 60 pa 65 aña, asina mes cu a hisa prima, asina mes Gabinete Eman ta libra su mes di cumpli cu pago di miyones di debe na e fondonan y ta trahando riba e proximo subida di prima pa Pueblo paga.

Esaki ta e consecuencia directo di e mal gobernacion di Gabinete Eman. Ta libra di tur garantia y ta tira tur cos riba e Pueblo pa nan paga extra belasting y prima pa asina Gabinete Eman por resta placa pa malgasta.

23 november 2014

Expresionnan haci den e articulo aki no necesariamente ta refleha opinion di ArenaPoliti.co