Evelyn Wever-Croes (MEP): Invitacion pa tur sostenedor di MEP pa registra na Congreso
STA CRUZ – Lider di MEP Evelyn Wever-Croes a extende un invitación pa tur sostenedor di partido MEP pa acudi na Congreso di MEP pa registra como miembro, pa asina por haya e carnet nobo entrega na su cas despues.
Hopi ta esnan cu a perde nan carnet, of no a ricibi di nan, y awor tin e oportunidad pa haya nan carnet. Acudi na Congreso di MEP pa bo registra.
Congreso ta tuma lugar otro siman diadomingo, dia 27 september, y ya caba hopi ta esnan cu a indica cu nan lo tey di trempan, pasobra nan tin miedo cu e lugar ta demasiado chikito.
Durante e Congreso lo tin algún discurso hopi interesante, y tambe e eleccion di lider. Tambe lo presenta e slogan nobo di MEP: Solo ta Sali pa nos tur. E logo nobo di partido tambe lo wordo presenta, y por mira cu e raha di libertad y e solo ta bek den e logo. Principalmente pasobra Aruba a perde su autonomía financiero y pesey mester trese e fénix, e para di libertad pa ilustra e lucha pa nos autonomía.
PROCESO DI REGISTRACION
Prome cu Congreso tin oportunidad pa tur sostenedor di partido MEP registra na Cas di Cultura, pa despues por ricibi nan carnet. E carnet lo wordo entrega na e miembro despues. Esnan cu registra lo ricibi un regalito bunita cu e logo nobo di MEP. Mesora despues di Congreso partido MEP ta cuminsa cu campanja electoral 2017, y pesey mester tin un sistema cu e datos di su miembronan mas actual posible.
“Pesey mi ta invita tur sostenedor di nos partido pa acudi na Congreso diadomingo 27 di september 2015, desde 4or atardi pa registra y participa na e evento importante aki di partido. Bin pa bo tambe scucha con partido MEP ta bai soluciona e problemanan di nos pais. Nos pais ta pasando den temponan hopi turbulento n aman di e peor gobierno cu nos a conoce. Nos ta pasando den e tempestad di AVP y e tempestad aki ta trese hopi sufrimento.
Expresionnan haci den e articulo aki no necesariamente ta refleha opinion di ArenaPoliti.co