Partido MEP a tuma nota di atakenan formal cu ta bin di parti di no solamente politiconan oponentenan sino tambe miembronan di prensa cumpra, contra lider di MEP sra. Evelyn Wever-Croes, y a haya ta necesario pa pone the record straight.

Evelyn Wever-Croes ta un dama profesional cu un carera di mas di 20 anja de sector publico y sector priva, prome cu ela drenta politica. Ela sacrifica su carera prometedor pa drenta politica, pa representa nos pueblo den Parlamento, pa despues wordo eligi como lider di partido MEP na forma DEMOCRATICO. Henter partido ta orguyoso di su estilo di liderasgo, firme y riba nivel resepta, manera e persona profesional cu e ta, cu e toque humano cu bo ta spera di un ser femenino.

Evelyn Wever-Croes ta esposa y mama, e ta yiu y ruman, sinembargo oponentenan ta mustra cu nan no ta spar ningun. Esaki pa MEP ta muestra cu Evelyn Wever-Croes ta cresiendo como lider, cresiendo na forma abrumador, y pesey oponentenan ta lansa atakenan asina feros contra su famia.

Evelyn Wever-Croes su Fe den Dios ta grandi, y e no ta sconde esey, y hustamente esey ta locual Aruba tin mester. Un lider cu ta somete su mes na boluntad y regla di Dios, pasobra ta solamente asina nos por logra saca Aruba di e abismo aki.

Den partido MEP tin un union mas fuerte cu nunca, como lider Evelyn Wever-Croes ta duna su candidatonan y especialmente parlamentarionan e espacio pa nan desaroya, pa nan crese y pa finalmente nan asumi responsabilidad. Un lider cu no ta mustrabo con pa hasi algo, sino un lider cu ta para hunto cubo, y hasi'e.

E bishita di Evelyn Wever-Croes na Hulanda luna pasa ta locual a causa oponentenan hopi dolor. mesora tur hende por a mira e contraste real entre e lider di partido oponente cu pa tapa su propio eror a bai den welga di hamber, a aparese na yoramento na television internacional, y a scohe pa bai core go-kart en bes di atende problemanan di nos pais. Mes momento Evelyn Wever-Croes a demostra kiko ta liderasgo di berdad: el'a subi avion, bai Hulanda y bai dialoga. 

Evelyn Wever-Croes tin respet y admiracion di henter nos partido, y esey tambe ta causa dolor na nos oponentenan.

Evelyn Wever-Croes ta menciona e palabranan di Margareth Thatcher hopi biaha: "I always cheer up immensely if an attack is particularly wounding because I think, well, if they attack one personally, it means they have not a single political argument left". Y ta berdad: e atakenan personal contra nos lider ta simplemente muestra cu no tin argumento politico mas, y e atakenan aki a pone nos Lider crese aun mas. Nos partido a conose 3 Lider grandi: sr. Betico Croes den felis memoria cu a duna su bida pa Aruba y a logra realisa e anhelo di nos pueblo, nos libertad. Sr. Nelson Oduber cu a dirigi nos pais na 4 ocasion na forma sublime, yprincipalmente a sa di hiba un maneho financiero responsabel. Awor nos tin Evelyn Wever-Croes como lider cu ta prepara y cla pa realisa cosnan grandi pa nos pais. Partido MEP ta bendiciona.