ORANJESTAD – Manera a keda anuncia, diaranson anochi, Gobierno di Aruba a cende e prome rotonde decora pa Pasco. Cu esaki, kier a duna ehempel y ta e prome di 13 otro rotonde cu ta bay wordo decora den aliansanan entre sector priva y gruponan social, bou coordinacion di oficina di BoBario. Prome Minister a gradici tur e boluntarionan presente, ya cu sea di DOW, BoBario of Elmar, tur esnan envolvi a pone tempo extra pa realisa e decoracion bunita riba Plaza Las Americas sin pidi nada a cambio.

“Den curason di cada Arubiano y un y tur cu ta biba na Aruba, ta cende tambe  e sentimento cu ta bin hunto cu Pasco, e sentimento di paz, fe y speransa,” Premier Eman a bisa na esnan presente. “Den e ambiente aki nos ta sinti cu nos tur como ruman ta duna un parti di nos; den cada un iluminacion, cada señal colorido ta yuda alegra curason di nos tur riba e pida baranca aki.” Prome Minister tambe a gradici empresa Moises de Marchena pa contribui na gradici e artistanan local cu a entretene e anochi. Ta trata di rumannan Jayden y Nayella Thijsen y Rakesh Persaud, cual ultimo a presenta Prome Minister cu un copia di su produccion pa temporada di fin di aña. Ortencia Kelly a ricibi for di man di Prome Minister un plakkaat como muestra di danki y aprecio na agrupacion T.A.K.L.A. pa nan cooperacion na e anochi.

Por ultimo, Premier Eman a dispidi cu satisfaccion indicando cu “Cu hopi stimacion, y sentimento profundo di convivencia cu henter pueblo,no por inicia un temporada di Pasco yena di alegria.”

Expresionnan haci den e articulo aki no necesariamente ta refleha opinion di ArenaPoliti.co