Gabinete ME II: Prome Minister Eman orguyoso di trabou realisa den bario di Primavera
![Mike Primavera2](/images/imagen/Mike-Primavera2.jpg)
ORANJESTAD – Primavera ta un di e barionan cu a haya atencion di Gobierno di Aruba, pa loke ta e aspecto di embeyecimento y infrastructura. Prome Minister Mike Eman a hiba su Accion di Bario den Primavera pa mira con e bario ta kedando cu tur e cambionan. Hopi comentario positivo cu ta yena e mandatario di orguyo pa e trabou cu su Gobierno ta haciendo.
Prome Minister Eman a sinti un positivismo grandi ora cu el a drenta Primavera pa mira con e bario a desaroya, cu cantidad grandi di cas y awor gran parti di dje a haya e embeyecimento priminti den e prome gobernacion di Gabinete Mike Eman. E parti cu falta, e mandatario a expresa, e ta spera di por wordo finalisa pronto ora cu e siguiente presupuesto keda aproba.
Tambe a bishita Club Primavera, funda door di comunidad Portugues, cu a bira un centro social y di recreacion combina cu actividadnan deportivo tanto pa e comunidad Portugues como ciudadanonan di Aruba. Ta trata aki di un club cu tin hopi aña di existencia y tin su necesidadnan. Hunto cu e directiva e mandatario a cana riba e veld, papia riba e cambionan cu kier haci riba e tereno p’asina mas tanto mucha posibel por haci uzo di esaki. Net banda di e veld ta bay tin construccion di Watty Vos Blvd cual lo tin su efecto riba e cancha. Ya caba a papia cu esaki lo mester move un poco y lo probecha pa haci e cambionan necesario y amplia esaki. BoBario hunto cu su boluntarionan lo duna un man pa haci algun trabou pero tambe pa drecha e luga. Prome Minister ta contento cu directiva no ta papia di un club di Portugues pero un club pa pueblo di Aruba mustrando e integracion den e bario.
Den e Accion di Bario, Prome Minister Eman a bisa, “no solamente nos ta bishita e casnan, pero ta trata di mira cual ta e organisacionnan cu ta yuda carga e bario, pesey nos ta bishita scol, iglesia of clubnan cu ta activo. Pasobra hunto cu e organisacionnan aki ta percura pa continuidad di e proyectonan cu mester wordo desaroya den un bario.” Esaki ta crea e sentido civico y un sociedad cu ta percura pa otro. “Nos ta contento cu Club Primavera ta hunga e rol aki den e bario di Primavera.”
Expresionnan haci den e articulo aki no necesariamente ta refleha opinion di ArenaPoliti.co