Cu masha asombro Parlamentario mr. Juan Ady Thijsen a tuma nota cu Baba Herde lider di Fraccion di AVP ainda ta biba den e mundo di fantasia di Mike Eman cu economia di Aruba ta esun mihor den Reino Hulandes y Region Caribense. Esaki ni un siman despues cu Ministro di labor Paul Croes a sali afo y a confirma e realidadnan amargo di nos economia na unda porehemplo tin 28,8 % di hubentud ta sin trabao.  Baba Herde ta mira un economia creciente na unda no tin problema di desempleo, no tin problema cu poder di compra, no tin problema cu negoshinan ta cera, cu no tin problema di pobreza. Casi bo por puntra bo mes ta unda Baba Herde biba of na unda e ta hinca su cabez pa no wak e realidad! E no ta lesa corant, e no ta scucha radio? Pio ainda e no ta lesa e tantisima rapportnan cu tin y cu ta elabora riba e cantidad di problemanan cu ta azota nos pais. Ta dicon Baba Herde ta kere cu Aruba tin un CAFT riba su lomba, pa pret? No Baba!!E problemanan ta serio y bo mester stop di sigi manipula cu cos ta bon na Aruba. Paul Croes ta confirma e realidad cu tin hopi desempleo y problemanan social pero segun parlamentario di MEP Juan Ady Thijsen ta lamentable cu Minister Paul Croes di Asuntonan di Labor y asuntonan Social ta bin cu solucionan robez cu conseguencianan grave pa cu e pueblo. Pa Aruba sali for di su problemanan mester cuminsa di acepta errornan cometi y bisa e berdad anto buska solucionan adecuado. Segun Parlamentario mr. Juan Ady Thijsen mester pone un paro na manipulacion y ganjamento di pueblo, pio ainda dor di lider di Fraccion di AVP, sr Baba Herde cual su tarea primordial ta pa controla Gobierno.

Expresionnan haci den e articulo aki no necesariamente ta refleha opinion di ArenaPoliti.co