Manera indica den e promer parti di e articulo aki tin un cantidad di ehempel concreto cu ta indica con AVP y sr. Croes ta hibando un maneho laboral contra di nos hobennan. 

Aumento di edad di pensioen
Apesar cu AVP kier keda persisti y hustifica cu a aumenta edad di pensioen na 65 pa scapa fondo no ta kita afor cu ta un decision cu no a wordo investiga den lo profundo pa analisa e efectonan pe mercado laboral. Aunke e ta importante pa señala cu nan ta contradeci nan mes pasobra den nan rapport di 2004 jama "een zeker pensioen" semper a papia di mantene edad di pensioen na 60 aña y awor a aumenta edad di pensioen cu tur su consecuencia pa e hoben. Nos hobennan mester reflexiona y cuestiona e hecho dicon AVP ta papia asina hopi pa salba e fondo di AOV pero ora toca e turno pa gobierno cumpli cu e fondo aki ta keda sin paga 60.5 miyon cu e debe? Realidad ta cu mayoria persona cu crusa un cierto edad no ta funciona y produci (sin generalisa) mescos cu ora nan ta hoben debi na diferente factor entre otro di salud. E simpel hecho di kier forsa tur hende traha te cu nan 65 aña tin efecto directo pa nos hobennan limitandonan di haya e oportunidad pa hasi nan entrada riba e mercado laboral debi cu e doño di trabou tin cu keda cu su trahador te 65 aña. Si bo wak e bon no ta cumbini ni e doño di trabou (pasobra e lo kier productividad halto), ni e trahador cu probablemente a labora asina hopi aña cu e kier bai cu pensioen tampoco e hoben cu kier cuminsa traha y gana placa. Logicamente si un persona tin cu traha algun aña mas ta nifica pa e hoben cu lo tin un vacatura mas despues y esei ta hasi'e un decision anti-hoben. 

Cu un AVP diploma porta di cielo ta habri! 
Minister Croes lamentablemente ta hasi su mes responsabel mescos cu hopi den Gabinete Eman pa e cultura crea di duna trabou door cubo tin un AVP diploma. Esaki sigur ta tristo mirando cu e ta un maneho discriminativo y no ohbetivo. Akinan ta duna ehempel cu tanto bal bo studia of no pasobra si bo ta "nos amigo" nos ta yudabo y si no bo mag keda sin trabou. Pa despues bo bin tende cu tin un cantidad di coordinador ganando sumanan astronomico siendo cu nan no ta capacita tampoco tin e opleiding necesario pa substancia cu nan merece tal salario. Dicon como hoben bo no a para pa loke ta husto y a reclama dicon e personanan aki riba payroll di gobierno tin salario halto cu yen di toelagen sin cu por hustifica esaki pa e nivel di trabou y responsabilidadnan cu nan tin? Den un otro articulo nos lo sigui elabora mas extensivo riba e tema di otorgamento di permiso y e partijdiploma. 

Pero no ta solamente riba e tereno laboral AVP a hiba un maneho contra di e bienestar di e hoben sino tambe ora ta trata di finansas publico, educacion y tereno social. Loke mas ta di lamenta ta cu Minister Paul Croes como miembro a wak, sostene esaki y awor como mandatario ainda no tin fin di para pa principio, para pa loke ta corecto y husto. Si realmente e futuro generacion ta prioridad e mester a demostra cu di berdad e ta prohoben y no solamente ta usa projectonan  envolviendo nos hobennan djis pa alsa su imagen como mandatario y trata na hustifica su maneho siendo cu na otro banda e ta torno e futuro di nos hobennan!

Expresionnan haci den e articulo aki no necesariamente ta refleha opinion di ArenaPoliti.co