Den e dianan cu a transcuri varios ta e comentario y analisisnan cu a wordo duna relaciona cu eliminacion di articulo 1613x door di Minister di labor sr. Croes. E ta hopi penoso pa wak un minister cu casi ta proclama su mes como un heroe mey mey di nos hobenan ta mustra su cara real cu un plan cu basicamente lo perhudica e hoben como un futuro trahador ora e subi mercado laboral. E cambio cu minister di labor a anuncia ta uno cu automaticamente lo bai afecta y perhudica tur futuro trahador esnan di bijstand, 50 plussers especialmente recien graduadonan y hobennan en general.

Apesar cu hopi biaha ta wordo bisa cu tin trabou na granel ta importante pa tur hende realisa cu papia semper ta facil pasobra realidad ta cu un caminda di crus tin cu wordo cana promer bo logra haya un trabou. Ora cu finalmente bo haye ta pabo keda largo y desaroya bo mes como trahador serca e dunador di trabou pabo hiba tanto bo mes y e compania dilanti. Esaki ta nifica cubo ta aim pa un termino mediano y largo. Na ningun momento e plan ta traha 6 luna y despues bula afor kedando sin entrada y tur e consecuencianan sociaal cu esaki ta trece cune. 

Como hoben semper bo ta imagina cu ora bo termina bo estudio bo lo tin un futuro briyante cu un tremendo funcion y compensacion (salario) ora di regresa bek Aruba. Como studiante bo no ta inverti miles di florin den un estudio por nada. Menos imagina despues cu pa via di flexibilisa leynan laboral bo lo por bai biba bou incertumbre di 2 aña largo unda cu doñonan di trabou lo por hunga manera yoyo cubo, trapabo, intimidabo, menasabo te ora bo por bira vast. 

Den pasado e Minister di Labor a anuncia cu lo prepara un plataforma pa asina por haya nos profesionalnan bek na nos pais. Realidad ta cu eliminacion di articulo 1613x ta un accion net contrario y ta hasi Aruba aun menos atractivo di loke e ta caba pa un recien gradua cu mester bolbe su pais pa paga bek su fianza di estudio, start un bida cu un situacion financiero bon balansa y stabilidad pe mes y su famia.  Pa un hoben profesional e cambio lo por mara su man bou di e subjectividad di dunador di trabou.

Cu e cambio den e ley aki Minister di labor Paul Croes ta torno e seguridad di trabou di tur hende y ta hasi su mes responsabel pa perhudica e stabilidad financiero y desaroyo sociaal pa un famia por para riba su pia. Pesei pueblo completo incluyendo nos futuro hobenan trahador y profesionalnan mester PARA CONTRA di e abuso aki! Pueblo y futuro trahadornan no mester bai tolera cu Minister ta hasi su mes responsabel pa crea instabilidad!

Expresionnan haci den e articulo aki no necesariamente ta refleha opinion di ArenaPoliti.co