Comunicado dedica na memoria di Henry Coffi (q.e.p.d.)

Awor cu ta sercano un deal entre CITGO y Pais Aruba pa loke ta e restart di parti di e refineria na San Nicolas den forma di un leasecontract, ta den noticia atrobe e responsabilidad ambiental di e compania VALERO. Cu esaki ta riba mesa atrobe e tema di e fondo miyonario cu a keda acorda entre Valero y Pais Aruba pa loke ta e cuido di e medio ambiente.

E fondo aki lo a keda maneha pa representantenan di Valero y representantenan di gobierno di Aruba. Cada aña lo a deposita un suma miyonario den e fondo aki, un account cu a keda habri na un banco local. Ora Red Democratico a haci pa prome biaha pregunta na Gabinete Oduber tocante e fondo aki, nos expertonan a calcula cu e fondo tabata tin 12 miyon dollar. Nunca Gabinete Oduber tabata tin e decencia di contesta nos preguntanan.

Despues Red Democratico a bolbe haci e mesun preguntanan na Gabinete Mike Eman, y tampoco Gabinete Mike Eman tabata tin e decencia di contesta e preguntanan. Ta trata di un fondo cu mester beneficia Pais Aruba y cualke gobernante decente lo mester mustra transparencia pa loke ta plaka di pueblo. Pero esei te awor no ta e caso na Aruba. Pesei pa di tres biaha nos ta ripiti e mesun preguntanan y por ta e biaha aki nos ta gana,  por ta “driemaal is scheepsrecht” tumando na cuenta cu nos tin awor un “vakminister” di finanzas.

Nos ta calcula cu e depositonan anual cu a sigui y e interes genera mester tin mas cu 20 miyon dollar den e fondo aki. Cuanto placa tin exactamente den e fondo aki? Con ta bai usa e fondo aki? E vocero di e team di negociacion di gobierno di Aruba a declara cu responsabilidad ambiental lo pasa di Valero pa CITGO, y e a menciona algo di un fondo di medio ambiente, esei ke men cu CITGO ta haya un regalo di 20 miyon dollars y despues lo keda deposita placa den e fondo aki? Of CITGO lo cuminza cu un fondo di cero, y esei ke men cu Valero ta keda cu e 20 miyon dollars? Si Valero no ta keda cu ne, ni CITGO, ta gobierno ta dispone di un fondo secreto di 20 miyon dollars? Por menciona cu nomber y fam e responsablenan di manejo di e fondo aki?

Red Democratico lo continua su linea di defensa ambiental y pro integridad/transpariencia. Keda pendiente di e reunion di miembronan di Red Democratico na fin di mei proximo, unda e taskforce actual lo duna espacio na un directiva nobo, cu un vocero nobo, cu lo tuma e liderazgo di e partido blanco. Nos ta spera cu pa e fecha ey lo tin claridad tambe riba e fondo ambiental, mirando cu ta papia di un acuerdo final cu CITGO pa fin di maart. Placa di pueblo ta sagrado y nos ta exigi transparencia den esaki.

Red Democratico

Expresionnan haci den e articulo aki no necesariamente ta refleha opinion di ArenaPoliti.co