Oranjestad: "Ultimo tempo Aruba ta wordo confronta cu un ola cruel di criminalidad. Ladronicia den establecimentonan y den diferente hogar, ta na ordo di dia. Esnan cu ta pasa den e momento desagrabel aki ta informa nos of ta raporta riba e diferente medianan social mane entre otro Facebook, cu esnan cu ta horta ademas di ta bai tradicionalmente cu articulonan di balor cu nan por cambia pa placa, ta hortando articulonan pa por sobrebibi manera paña y cuminda. Actualmente tin 12 mil cliente cu restraso pa paga nan cuenta di awa. Nos no sa cu e exactitud e situacion na Elmar, pero si pa awa mes no por cumpli, maginabo con e situacion di coriente lo ta! Tur esakinan ta señalnan latente cu Aruba ta confrontando un situacion di pobresa cronico!

Ora nos analisa e desaroyo social economico di Aruba den pleno 2015 y compara esaki cu por ehempel momentonan historico manera entre otro e "Gran Depresion" Mericano di 1929-1939, nos no por keda sin reconoce e relacion entre e aumento di pobresa den nos comunidad y e situacion alarmante di criminalidad. Na momento cu ladronicia desaroya su mes rond di un necesidad asina primario mane cuminda, ta e momento pa tur alarma bai on! Algo mester cuminsa sucede tanto na nivel di Husticia como esun Social. Gabinete di sr. Mike Eman a promete Pueblo un Aruba di 5 strea. E realidad ta cu e gabinete di sr. Eman su prioridadnan ta totalmente robez y lamentablemente Pueblo lo termina ta paga p'e!"

Expresionnan haci den e articulo aki no necesariamente ta refleha opinion di ArenaPoliti.co