Minister Oduber satisfecho cu crecemento di turismo  

Na 2008 pa 2009 Aruba a conoce un caida grandi di e mercado turistico Mericano despues di e crisis economico. Esaki tabata net e aña cu Minister Otmar Oduber a tuma e responsabilidad pa traha na bienestar di nos pilar economico, turismo. Awendia nos por ta orguyoso cu e mercado Mericano ta conociendo crecemento constante. Recientemente nos a nota cu pa e luna di october mercado Mericano a conoce un crecemento di 10.1% cu ta traduci den un total di 46.778 turista for di Merca cu a bishita nos isla y cu keto bay ta sigui ta nos mercado principal. Pa october 2015 e cantidad di bishitantenan for di Norte America a aumenta cu 9.9% y ta representa 45.1% di e mercado total pa lo cual ta trata nos turismo.

Merca tabata y lo keda por lo pronto nos mercado di mas importante y awor cu e situacion na e pais aki a mehora considerablemente e enfoke di mercadeo akinan ta aumentando unda ta mirando e posibilidadnan di diversificacion den dje mientras cu ta dirigiendo e campañanan na un forma mas directo y concreto riba e mercadonan afluente. Esaki conhuntamente cu e esfuerso grandi di AAA pa acomoda tur e vuelonan cu ta bin di Merca ta contribui sigur na e exito aki.

Por te hasta menciona cu te october e aña aki e cantidad total di bishitantenan pa nos isla a crece cu 15.2% compara cu 2014 y Merca a crece cu 8.8%. E cifranan aki ta e cifranan mas halto den e ultimo 10 añanan. Un indicacion directo riba e bon cooperacion entre entidadnan turistico y e trabou duro di cada un.

Minister Otmar Oduber ta hopi satisfecho cu e cifranan aki.

Expresionnan haci den e articulo aki no necesariamente ta refleha opinion di ArenaPoliti.co