Minister Otmar Oduber: Paardenbaai Plaza, un otro proyecto cu ta sigui mehora calidad di Producto Aruba
![101215 otmar 1](/images/779x490/101215-otmar-1.jpg)
Minister Otmar Oduber a realiza un site inspection na Paardenbaai (Welcome) Plaza Fase I mirando cu e entrega oficial di e proyecto aki lo ta diabierna. Hunto cu Minister Oduber tabatin presente miembronan di ATA, Gerencia di APA y tambe Director di Departamento Transporte Publico (DTP).
E mandatario a indica cu su colega Sevinger ta bezig cu e proyecto aki cu ta wordo entrega diabierna y cu e di dos fase lo acomoda e parti di e kioskonan mas e matanan y yerba cu mester bin pa e embeyecimento di e area aki. El a felicita su colega pa e buniteza di proyecto cu ta un inversion mas pa mehora calidad di Producto Aruba.
El a bisa cu e instancianan ariba menciona kier hunto cu e facilidad nobo aki, brinda un servicio di calidad na nos bishitantenan. Otro aña lo bay ta uno sumamente exitoso pa loke ta mundo crucero pa Aruba y ta importante pa por brinda e mesun calidad cu nos ta ofrece den Producto Aruba den e servicio.
Minister Oduber a recorda con mas o menos 3 aña pasa ora ainda tabatin e tankinan riba tereno banda di salida di pasaheronan crucero y a remodela e tereno, e tempoa sinta cu tur e tour operators y a yega na cierto decisionnan cu a funciona hopi bon. Pero despues di esey mester a movenan ora a bin cu e tram y tambe cu embeyecimento di Paardenbaai Plaza.
![101215 otmar 2](/images/779x490/101215-otmar-2.jpg)
“Awe e infrastructura akinan ta crea di tal forma cu e tour guidenan por brinda un bon servicio. Den e prome fase tin espacio pa acomoda mas o menos 14 bus, pero nos sa cu e cantidad ta hopi mas, unda cu hasta por tin 30 pa 40 na mes momento na waf. Pa e motibo ey mientras ta prepara e di dos fase lo tin un area cerca unda cu e otro busnan por acomoda nan mes”, Minister Oduber a duna di conoce. El a indica tambe cu e fluho di tourbusnan lo wordo regla via un sistema organiza cu lo sigura un bon servicio manera tabata wordo brinda semper.
Minister Otmar Oduber a felicita Sr. Figaroa y henter e team di APA pa e trabou cu a haci durante ultimo añanan. Den e periodo aki practicamente henter aña tabatin trabou pa e tour operators, contrario na antes cu e temporada tabata caba na mei y cuminsa na october. Pa e ultimo 2 añanan y otro aña no lo ta diferente, al contrario, mas positivo, por a mira cu tur e lunanan di aña tabatin un cantidad di barconan cu ta drenta nos waf.
Finalizando, Minister di Turismo a felicita pueblo di Aruba y bisa cu Aruba a bin ta invertiendo hopi den loke ta trata infrastructura, den calidad di producto pa por mehora ainda mas e calidad di nos turistanan y Plaza Paardenbaai ta un bibo ehempel di e compromiso cu tin entre Gobierno, APA, ATA y DTP.
![101215 otmar 3](/images/779x490/101215-otmar-3.jpg)
Expresionnan haci den e articulo aki no necesariamente ta refleha opinion di ArenaPoliti.co