Hoben profesional Arubiano ta bay encabesa estudio na Aruba 
Minister Mike de Meza ta aplaudi 'Corporate Citizenship' di Setar como partner den e estudio di nos medio ambiente 

ORANJESTAD – Analisa ki balor medio ambiente tin pa Aruba pa despues incorpora e resultado den educacion y maneho ta intencion tras di un investigacion cu ta bay wordo realisa door di Wolfs Company (Nature by Numbers) encabesa pa Esther Wolfs. E acuerdo pa realisacion di e estudio aki a wordo firma den oranan di merdia den sala di conferencia di Minister encarga cu Asuntonan di Medio Ambiente ing. Mike de Meza. Presente na e ocasion aki tabata tambe director di e empresa financiado di e estudio ing. Roland Croes di SETAR N.V. y director di Yabi Consultancy, Franciella Lacle, kende lo realisa gran parti di e investigacion. Miembro di Hunta di Comisario di SETAR Franklin Hoevertsz y Alvin Boekhoudt, consehero huridico di SETAR, tabata presente pa e ocasion importante aki.

“Pa SETAR esaki ta un momento hopi special. Normalmente SETAR ta conoci pa su patrocinio riba tereno di educacion y cultural, pero e biaha aki nos ta participa den un proyecto hopi special pa Aruba. Den e proyecto aki ta busca pa defini e balor cu e recursonan cu nos pais tin, manera beachnan y naturalesa,” ing. Croes a trece dilanti.  Esaki ta importante entre otro pa motibo cu Aruba ta un pais turistico, y pa medio di e investigacion ta haya un formula pa defini e balor cu naturalesa tin. Pero tambe e ta un instrumento importante pa Gobierno den su maneho. Di e forma aki SETAR ta cumpli cu su responsabilidad social como corporacion.

E investigacion aki cu lo tin un duracion di un aña y mey ta conta cu aprobacion di Gabinete Mike Eman II pa cual e Minister encarga a firma e documento di acuerdo pa brinda tur cooperacion necesario na e investigacion aki. “Awe ta un dia hopi special pasobra nos a firma un acuerdo pa realisa un estudio cu ta wordo ehecuta pa Wolfs Company cu a haci e investigacion di e indole aki na Boneiro tambe. E ta un estudio hopi importante, pasobra ta studia e fragilidad, y e relacion di nos Medio Ambiente y su contribucion pa economia di Aruba. No solamente e economia, pero tambe e bida socio-economico,” e mandatario encarga cu Medio Ambiente, ing. Mike de Meza, a expresa despues di e ceremonia di firmamento.

E estudio aki ta uno importante ya cu e lo contribui cu hopi informacion pa educacion na Aruba y pa maneho den futuro riba e bida socio-economico y medio ambiente.

Gobierno a cera conoci cu e tipo di estudio aki cuatro aña pasa durante un presentacion di Franciella Lacle, pero mester a busca un partner pa financia e estudio. “Nos tabata hopi impresiona cu resultado di e estudio y a expresa nos interes. Nos tabata busca un partner di Aruba cu por a yuda nos den e investigacion," Minister de Meza a splica, "Mi tin cu bisa cu na momento cu nos a combersa cu director di SETAR tabata hopi great e reaccion positivo cu nos a haya e tempo ey caba di director di SETAR. E ta algo cu e ta kere den dje y e ta muestra tambe di e 'Corporate Citizenship' di compania SETAR.”

Minister de Meza a expresa di ta entusiasma cu e acuerdo y inicio di e estudio cu ta busca e interlink di e economia, bida socioeconomico y medio ambiente. E estudio no ta solamente un investigacion di un compania pero lo consulta cu NGO-nan y Universidad di Aruba. El a recorda cu Repsol ya caba a haci diferente investigacion durante cu nan tabata haciendo investigacion pa exploracion di gas den awanan teritorial di Aruba. “E lo crea un base documenta profesional pa nos medio ambiente, cual sin dje nos no por biba. Si nos kier celebra humanidad, nos tin cu carga nos medio ambiente.”

Expresionnan haci den e articulo aki no necesariamente ta refleha opinion di ArenaPoliti.co