E ta remarcabel con e lider di Fraccion di AVP ta tilda MEP pa ta practica populismo descabeya ora di presenta mocion bisando cu nos di MEP no ta splica di unda e fondo lo bin pa cubri e gastonan relaciona cu e mocionnan cu nos ta presenta. Ta parce manera cu Baba a lubida por ehempel riba e grito populista di su lider Eman pa elimina BBO. Pasobra ta cu e grito populista aki di elimina BBO, Minister Eman a yega y a keda na poder. Condenabel ta cu Baba como parlamentario enves di pone un paro na e practica di populismo di Minister Eman, ta sinta papia bon net locual ta perhudicando e bienestar di nos Pueblo.

Populismo descabeya
Segun Baba, ta facil pa propone cosnan cu ta zona masha atractivo y hasta deseabel, pero si bo no bisa con ta paga pa nan, bo ta gaña pueblo. Bo ta actua irresponsabel. Nos ta bisa mesun cos. Ta facil pa Minister Eman propone pa elemina BBO, keda sin bisa di unda otro lo saca placa pa goberna y keda gaña cu tur cos ta bon na Aruba siendo cu ta redobla e debe y hiba nos Pais bou supervicion financiero di CAFT. Di e manera aki Minister Eman ta actua iresponsabel den gobernacion di nos Pais. Pero mas iresponsabel y descabeya ta e populismo practica pa Baba buscando moda pa culpa henter mundo pa e fracaso di gobernacion di Minister Eman enves di enfrenta Minister Eman cu e berdad cu ela faya den goberna nos Pais na drechi.

Stop di core pa responsabilidad
Baba y Minister Eman mester realisa cu nan no por sigi core pa nan responsabilidad. E grito populista di Minister Eman pa elemina BBO a causa un daño grandi na nos finanzas publico y tambe na e stabilidad economico di nos Pais. Esey tabata e decicion di mas descabeya pa nos Pais y enves cu Baba a condena esaki te dia di awe e kier papie bon. Ta yega ora pa Baba y Eman asumi nan responsabilidad y realisa cu nan no por sigi perhudica e bienestar di nos Pueblo cu tanto populismo.

9 februari 2016

Expresionnan haci den e articulo aki no necesariamente ta refleha opinion di ArenaPoliti.co