Un cantidad grandi di simpatisantenan di partido AVP cu ta alabes fanaticonan di Bingo a bini hunto fin di siman pa e Bingo di fin aña, cu a tuma luga na Club Caiquetio. E tabata un anochi hopi ameno, cu un ambiente total y tabata sold out for di prome cu e evento a cuminsa mes.

Por a nota presencia di lider di fraccion di AVP den Parlamento, drs. Rene Herde, kende a expresa alegria di mira participantenan di tur skina di Aruba. “Tur aña nos ta organisa un evento pa nos hendenan di partido y e aña’ki a scoge pa un Bingo, ya cu e ta algo masha gusta den pueblo,” Herde a duna di conoce e anochi aki. Y a agrega cu ta algo tradicionl di e famia AVP pa bini hunto na fin di aña.

Prome Minister Mike Eman y lider di partido AVP tambe tabata tey pa saluda e simpatisantenan di AVP na Club Caiquetio. Varios di e miembronan di AVP, tanto Ministernan como Parlamentarionan tabata presente e anochi pa duna un man den e evento y percura cu tur hende ta sinti nan mes na cas na un momento asina alegre di fin di aña. Vice Presidente di Staten Chris Dammers, a gradici tur esnan di famia di AVP cu a bin disfruta di e anochi di Bingo. El a conta cu for di momento cu a habri pa registracion 5ór di atardi, por a sinti cu e anochi lo bay ta exitoso y “dunando asina apoyo na e trabounan cu partido AVP a bin ta haciendo,” Dammers a comenta. “Hopi di e hendenan a comenta cu nan a bin pa apoya partido y tin hende hasta a cumpra dos buki y a bini cu famia pa disfruta di e anochi.”

Partido AVP mes no a spera asina un publico grandi. Diadomingo atardi e miembronan di AVP a demostra un apoyo grandi pa nan partido. “Nos mester a busca mas stul y mesa na momento cu e luga a cuminsa yena,” Parlamentario pa AVP Marlon Sneek a comenta durante e evento. “Nos ta hopi contento pa mira con e pueblo a asisti masalmente na e bingo di Partido di Pueblo Arubano AVP.”

Despues di 16 aña organisando concierto di speransa, AVP a dicidi pa organisa un bingo, unda famianan por sinta hunto den ambiente festivo y pone poco bon premio pa e ganadonan, Sneek a duna di conoce. E evento tabata exitoso di berdad y fanaticonan di bingo a bin reserva nan luga for di 1ór di merdia. Segun Sneek, mayoria carchi a wordo bendi den pre-venta. “E sold out di e evento ta demostra cu e pueblo ta sostene su partido."

Expresionnan haci den e articulo aki no necesariamente ta refleha opinion di ArenaPoliti.co