Cu dolor na nos curazon, PPA a tuma nota di e fayecimento di sr. Ing. Virgilio Kock. Sr. Virgilio Kock a milita den seno di PPA entre 1967 pa 1985.
Na anja 1967 sr. Virgilio Kock a aparece riba lista di PPA y a bira miembro di Eilandsraad di Aruba. Na 1970 sr. ing Virgilio Kock a asumi e posicion di Diputado di Teritorio Insular di Aruba encarga cu e.o. D.O.W. cual posicion el a occupa te na anja 1975. Na 1975 sr. Virgilio Kock a bira miembro di Staten di Antiyas Neerlandes cual posicion el a occupa te na 1979. Durante e periodo di 1977 pa 1979 Sr. Virgilio Kock tabata tambe Lijsttrekker y Presidente di PPA. Na 1979 el a worde elehi un vez mas como miembro di Eilandsraad pa e periodo 1979 pa 1983. Durante e periodo aki el a sirbi tambe como Lider di fraccion di PPA den Eilandsraad di Aruba.

Durante su trajectoria e tabata tambe un ‘architecto renombra’ aki na Aruba durante cual periodo el a pone su ‘stempel’ riba varios projecto unda su contribuiccion tabata grandi e.o. E kapel Emannuel na San Nicolas, Aeropuerto di Aruba y nos Hospital nobo di Aruba. El a occupa tambe e posicion di director di D.O.W./Obras Publico pa varios anja.

Sr. Virgilio Kock tabata tambe Comissario di Banco Central di Antiyas Neerlandes y presidente di Volkskredietbank.

Un gran arubiano a larga nos !! Durante su trabao Ing Virgilio Kock tabata ejerce su trabao cu un amor grandi pa sirbi su pais su pueblo y e organisacion cu e tabata representa. Mei mei di su seriedad y dinamismo semper e tabatatin espacio pa un chiste…..pero manteniendo e accento riba e seriedad necesario pa finalisa e trabao di representancion di su pueblo.

PPA ta manda palabranan di condolencia na su juinan, su nietonan, su rumannan y demas famia y Amistad. Un gran arubiano a bai sosega…!!

Un bida dedica na sirbi su pais, construccion y creatividad y na su famia stima a jega na su final ora Todopoderoso a jama sr. ing Virgilio Kock den su Reino.

PPA lo recorda e contribuccion di sr. ing. Virgilio Kock na nos pais Aruba pa semper cu Ing, Virgilio Kock sosega na paz !


Aruba, 8 di maart 2016
Na nomber di directiva y Conseho di Partido PPA
Benny Nisbet

Expresionnan haci den e articulo aki no necesariamente ta refleha opinion di ArenaPoliti.co