Actualemente pais Aruba tin un minister di infrastrcutura cu no solamente no tin maneho, no ta respeta ley, no ta respeta regla pero un minister cu mester a entrega su retiro hopi dia caba. Den apenas un luna di tempo minister Benny Sevinger tin 3 sentencia den su contra. Tin un cantidad di decisionan robez cu e ta tumando lugar y ainda e minister en cuestion ta keda manera nada no a pasa. Den un otro pais un promer minister lo a exigi y urgi e minister controversial aki pa entrega su cartera. Na Aruba tur cos ta posibel cu e gobierno aki. E situacion ta bai asina lew cu ni sentencia di huez Benny Sevinger NO ta respeta mas.
Ta tristo si cu awe despues di mas cu 6 anja mester constata cu e maneho di Benny Sevinger no ta dirigi pa duna pueblo tereno pa construe cas, no ta dirigi pa duna FCCA tereno pa construe casnan social pero mas bien ta dirigi pa privilegia amigonan, candidatonan di AVP y coordinadornan.
Na Aruba na e momentonan aki tin un lista di espera di 11.000 personan cu ta wardando pa un cas. Famianan ta sclamando pa por bin na remarke pa haya un pida tereno pero lamentablemente esaki no ta priordad pa Benny Sevinger. Ta depende kende bo ta, ki fam bo tin, bo ta bon na remarke pa haya tereno. Duranre tratamento di presupuesto nos a haci minister Sevinger e pregunta pakiko gobierno no a construi ningun cas social e ultimo anjanan aki y cuanto persona tin inscribi pa bin na remarke pa un cas social. Esaki tawata e contesta duna na parlamento.
Banda di 11.000 persona cu ta riba lista pa haya un tereno pa traha un cas tin 3060 persona inscribi pa haya un cas social. Envez cu gobierno ta pro activo y ta traha pa yuda esnan den mas necesidad ta haci net contrario. Gobierno ta contesta parlamento cu ta depende di e beschikbaarheid di tereno lo wak si ta construi mas cas social. Cu e conesta aki gobierno ta ignora e problema serio cu tin di escasez di casnan social y loke nos ta cuestiona ta e hecho cu con por ta posibel cu pa amigonan, coordinadornan y candidatonan di AVP si tin cantidad di tereno anto pa pueblo NO. E maneho inhusto aki mester caba. No por ta asina cu un grupo amigo di Benny Sevinger ta wordo privilegia y beneficia den tur sentido anto e pueblo en general ta wordo perhudica!

Expresionnan haci den e articulo aki no necesariamente ta refleha opinion di ArenaPoliti.co