Locual cu ta pasando na nos Pais no tin presedencia. Tin un abuso grandi cu tereno publico den cual Minister Sevinger ta parti ‘dezerzijds akkoord’ na grandi. E ta un berguensa pa mira cu hasta parlamentario cu Pueblo ta confia cu nan ta haci e trabou di controla Gobierno tambe ta envolvi den abuso cu tereno publico. Di e manera aki nos Pais ta bay perdi na man di esnan cu enves di controla ta yuda abusa e Pueblo. 

Ta yobe ‘dezerzijds akkoord’ 
Poco dia pasa Pueblo a haya prueba di con Minister Sevinger ta firma ‘dezerzijds akkoord’ den solamente 5 dia di tempo pa Roberto Rincon sospecha di soborno y labamento di placa na Merca. Tambe a bin dilanti prueba con Minister Sevinger ta firma ‘dezerzijds akkoord’ den 1 dia di tempo pa previligia Minister Otmar cu tereno di huur contra tur regla di bon gobernacion. Y awor ta parlamentario Melvin Tromp ta haya ‘dezerzijds akkoord’ pa asina por bende tereno publico pa gana un cantidad barbaro di placa a costo di tur esnan cu tin añas ta warda riba un pida tereno pa traha un cas. Ta parce manera cu na nos Pais ta yobe ‘dezerzijds akkoord’ y nada no ta wordo haci pa para e abuso na unda tereno publico ta wordo otorga na esnan serca di Gabinete Eman y ta laga esnan cu tin añas ta warda pa un tereno cu man bashi.

Enves di controla ta abusa
E ta un berguensa cu net parlamentarionan cu ta suppose di controla gobierno y cuestiona e practica robes aki di Minister Sevinger awor ta resulta di ta meti tambe den e abuso cu tereno publico. Pasobra for di e prueba cu a bin dilanti ta bira bisto cu Parlamentario Tromp su unico meta cu e tereno publico ta pa haci speculacion pa asina e por enrikese su mes y no tabata tin intencion di traha un cas riba e tereno cu e mes a declara di a haya mas di 20 aña pasa.

Rechasa y condena e abusonan aki
Locual Parlamentario Tromp a haci merece rechaso y condena. Nos di Fraccion di MEP ya for di un principio a pidi un reunion publico cu Minister Sevinger riba otorgacion y cambio di destino di tereno pa asina atende cu e abusonan di Minister Sevinger. E Presidente di Parlamento ainda no a yama e reunion aki pa motibonan ainda desconoci. Pero tur esten ta na su lugar pa Minister Dowers condena e abusonan aki y hala atencion di Minister Sevinger y di Parlamentario Tromp. Ta yega ora tambe pa Ministerio Publico manda e senial pa e comunidad cu e practicanan aki di Minister Sevinger y Parlamentario Melvin Tromp no ta corecto y ta condenabel, ya cu ta contra tur principio di bon gobernacion pa abusa cu tereno publico. Laga nos no lubida cu ya caba e ex Parlamentario Westerhoff di AVP a bandona Parlamento bou sospecho di labamento di placa cu tereno publico y niun dia nos a tende Ministerio Publico duna un comentario riba esaki. Awor ata otro Parlamentario di AVP envolvi den abuso cu tereno publico y Pueblo no por keda warda pa wak kendenan ainda falta pa abusa di nan. Nos no por laga nos Pais bay perdi na man di esnan cu enves di controla ta yuda abusa di e Pueblo aki.

11 maart 2016

Expresionnan haci den e articulo aki no necesariamente ta refleha opinion di ArenaPoliti.co