Gobierno a firma contract cu Philips Centro America pa inicia e proyecto.

ORANJSTAD - Ministernan Sevinger y Eman a firma un contract cu Philips Centro America fin di siman pasa. Pa Philips a firma Projects Sales Manager Hector Mendoza. E contract ta encera cu Philips ta cambia tur e luznan convencional den 35 edificio di gobierno pa luznan LED y tambe ta pone iluminacion espectacular riba Plaza Padu y Plaza Paardenbaai (antes Welcome Plaza). Ta usa tecnologia moderno y avansa cu por controla e luznan. Conversion di luznan di convencional pa LED ta spaar hopi placa cu ta wordo uza pa paga e proyecto di conversion durante un periodo di cinco aña. Mendoza a bisa cu pa nan di Philips Centro America ta un honor traha cu Aruba den e proyecto aki.

Mendoza: "Dos aña pasa nos tabata aki pa papia di e proyecto cu gobierno di Aruba y mesora hunto cu nos team a discuti con desaroya e idea cu tabatin riba mesa. "Nos hefe e tempo ey, Henk de Jong, a papia cu Prome Minister y nos a yega na e conclusion cu nos por traha e proyecto y use como un showcase pa e region. Mundo di iluminacion ta cambiando. Loke nos por haci awendia cu iluminacion ta impresionante. Loke nos ta bay haci na Aruba cu iluminacion ta bay ta fascinante. Cosnan diferente y riba e plazanan, adulto, hoben y mucha ta bay experencia luznan den un forma diferente. Iluminacion a bira mucho mas cu simplemente luz den nos casnan. El a bira algo pa sinta disfruta di dje, di su colornan y impacto." Mendoza a bisa cu e proyecto aki ta haci e soño di Prome Minister bira un realidad.

Minister Sevinger a conta cu semper ta importante pa logra metanan. "Nos di Infrateam ta contento cu nos a yega te aki awe, firmando un contract cu Philips, despues cu dos aña pasa a start explora e posibilidadnan di e proyecto aki. Un contract importante ya cu e ta encera un cambio grandi di nos edificionan publico y dos parke importante. Pa Infrateam ta algo tremendo pa ta parti di e proyecto aki y mas importante ainda pa ta parti di e vision di gobierno di Aruba y primordialmente di Prome Minister, kende semper a pone e mision su dilanti pa na 2020 Aruba ta 100% sostenibel. Pesey mi ta felicita Prome Minister cu a dal un paso mas den e direccion ey. Pa nos di Infrastructura ta importante pa tin inovacion y ta haciendo hopi e ultimo añanan cu entre otro proyectonan PPP (Public Private Partnership) y esaki ta un proyecto asina. Pa nos ta importante pa sigui siña y sigui desaroya nos mes."

Expresionnan haci den e articulo aki no necesariamente ta refleha opinion di ArenaPoliti.co