Ta inicia cu construccion di 20 cas pa e proyecto unico y progresivo aki. 

ORANJESTAD - Dialuna den oranan di atardi e proyecto innovativo y unico 'Smart Community Aruba' ta haya señal di salida pa construi 20 cas na Kibaima cu ta bay funciona den forma completamente sostenibel. Esaki den tur sentido di palabra. E awa cu ta uza ta wordo re-uza, mescos cu coriente ta wordo genera door di energia berde, sushi di cas ta wordo reclicla y asina por sigui. Aruba por ta chikito den tamaño, pero ta mustra mundo cu e ta grandi den vision y innovacion. Cada dia cu pasa e isla ta dal un mas den direccion di ta 100% sostenibel na 2020. 'Smart Community Aruba' ta un proyecto cu ta test tecnologia den un situacion real.

'Smart Community Aruba' ta trece hunto un mix unico di ingrediente: e sosten di un consorsio di utilidadnan di awa y coriente (WEB NV y ELMAR NV), compania di comunicacion SETAR, fundacion FCCA, Gobierno di Aruba y TNO Caribbean Branch Office. Mas importante ainda ta cu 'Smart Community' tin su base na Aruba, un isla bunita cu durante henter aña tin un potencial di 5 mil ora di biento y 2 mil ora di solo. Obhetivo principal ta desaroyo di conocemento relaciona cu solucionnan tecnologico cu por wordo midi y modelonan di compania cu por yuda Aruba haci e transicion pa energia sostenibel bira un realidad.

Obhetivonan principal ta pa gana experiencia cu integracion di energia renobabel den gridnan chikito. Pa evalua pa tin tecnicanan di construccion sostenibel y den forma eficiente. Haci uzo eficientemente y na manera innovativo cu awa y tur loke ta regarda awa. Desaroya servicionan di energia nobo y siña conoce actitud di e consumidor. Crea oportunidadnan pa partnernan priva pa showcase, test y certifica sistemanan di construccion y nan diseño.

'Smart Community Aruba' ta wordo coordina pa TNO (Caribbean Branch). TNO ta un compania non-profit di estudio y investigacion independiente cu tin experiencia di mas di 80 aña. TNO Caribbean Branch por asisti den yuda desaroya solucionnan for di un perspectiva independiente. Dialuna, dia 18 di april, 'Smart Community Aruba' ta haya señal pa start e proceso di construccion di e casnan. Esaki ta bay acompaña cu un splicacion di tur loke e tremendo y unico proyecto aki ta nifica pa Aruba y su hendenan.

Expresionnan haci den e articulo aki no necesariamente ta refleha opinion di ArenaPoliti.co