ORANJESTAD - Siman pasa Ministernan Eman y Sevinger a firma un acuerdo di intencion cu e fundacion FCCA. Pa FCCA a firma director van Poppel. Minister Bermudez a firma e acuerdo despues. Director di FCCA, meneer van Poppel a wordo compaña pa miembronan di su staff y parti di directiva di FCCA. Prome Minister Eman a duna un splicacion cortico kico e acuerdo cu a firma ta encera.

Eman: "Algun aña pasa cu nos a transferi casnan di pueblo cu tabata di gobierno situa na Jara, Yuana Morto y Pos Chikito pa FCCA. E casnan aki tabata den un estado hopi malo y nos a haya importante pa inverti den mehoracion di e casnan aki y a haci esaki cu e partner mas principal cu gobierno tin den desaroyo di vivienda na Aruba cu ta FCCA. Nos a experencia con den ultimo añanan nos a haci hopi trabou den inverti den e barionan cu ta existi pa hopi aña. Tambe den ampliacion di e facilidadnan cu e barionan ta ofrece, deportivo, recreativo y mucho mas. Nos a inicia cu e proceso pa verf e casnan di nobo cu dibuhonan y aki ta unda FCCA a hunga un rol importante. A envolvi hobennan di e bario den e proceso y esey tabata algo masha positivo."

Eman a splica cu hunto cu FCCA ta bay construi hopi mas cas den e añanan benidero. Pa esey Minister Sevinger ta bay otorga tereno na FCCA. E añanan cu ta bin e enfoke ta bay ta mas ta riba construccion di cas. Tambe renobacion di e casi 500 casnan cu gobierno ta bay pasa over pa FCCA. Esey ta e acuerdo di intencion cu a keda firma. Un proceso cu ta bay cana su curso. E documento tin cu bay Raad van Advies y Parlamento di Aruba pa haya su aprobacion cu no ta bay ta un problema, ya cu Parlamento ta di opinion cu FCCA ta e organisacion indica pa haci  trabounan di vivienda. Esaki ta encera tambe construccion di casnan pa hende grandi y famianan jong.

Eman: "FCCA tin un programa amplio di proyectonan cu e kier realisa den e añanan nos dilanti. Asina cu ta posibel nos lo duna hunto cu FCCA un presentacion di e proyectonan aki, entre nan e senioren woningnan. E casnan aki ta bay ta na interes mutuo di nos y FCCA. " Prome Minister a gradici su colega Sevinger cu ta e minister encarga cu e cartera aki. Tambe hopi palabra di elogio pa director di FCCA van Poppel, su staff y directiva.

Expresionnan haci den e articulo aki no necesariamente ta refleha opinion di ArenaPoliti.co