Prome Minister Eman "Aruba tin partnernan cu boluntud, curashi y determinacion pa logra cosnan grandi"

ORANJESTAD - Na Kibaima, riba un cerito, tabatin un ceremonia pa motibo di lanzamento oficial di e proyecto alentador 'Smart Community Aruba'. E evento cu a bay acompaña pa un ambiente di optimismo, tabata bon atendi cu habitantenan di e bisindario, directornan di departamento di gobierno y institucionnan priva, parternan di e proyecto, varios parlamentario y ministernan de Meza, Sevinger y Eman. E esfera cu tabata reina tabata uno positivo mirando e embergadura di e proyecto 'Smart Community'. Su construccion ta den porta mirando cu e prome parti mester keda cla den 11 luna. Un proyecto cu ta consisti di 20 vivienda cu ta bay haci uzo di e tecnologianan mas 'berde', moderno y avansa cu tin riba tereno di sostenibilidad. Un bon proyecto cu ta pone Aruba den vitrina mundial un bes mas.

Prome Minister Mike Eman, kende semper a kere den sostenibilidad y a hiba al cabo e concepto 'berde' di su Gabinete y sigur su vision 2020. For di bankinan di oposicion caba, Eman y su team tabata traha hunto riba plannan pa logra un Aruba sostenibel. Ta pesey cu no por ta otro cu dialuna atardi e Prome Mandatario di pais Aruba tabata un homber orguyoso y satisfecho cu lanzamento di 'Smart Community Aruba'. Eman a cuminisa su discurso bisando 'if it was easy everyone would do it'. "Nos ta para aki un par di aña despues cu nos a pone como meta pa inicia e proyecto aki. El a tardi un poco paso pasobra cu e proyecto a resulta di ta uno cu retonan grandi y cu un vision cu ta surpasa loke nos ta haci a base diario den nos pais. Pa un proyecto manera esaki bo mester di partnernan cu ta kere den vision, cu kier tuma riesgo y cu kier surpasa bareranan y cruza fronteranan pa asina habri oportunidadnan nobo." Prome Minister Eman a gradici tur e partnernan envolvi , pasobra ta dificil pa surpasa reto y bareranan si bo tin partnernan cu ta comparti e mesun pensamento y vision cu bo. Eman a gradici e team di FCCA y muy en particular su director sr. van Poppel, Caribbean Branch Office TNO, Jan Ebbing y su team, companianan di utilidad WEB NV, EMAR NV, tambe SETAR NV, arkitecto Mathews, Wegenbouw y Albo NV, e bisiñanan di Kibaima y su coleganan Sevinger y de Meza.

"Aruba tin partnernan cu e boluntad, curashi y determinacion pa logra cosnan grandi pa nos pais. Mi ta gradici nos Creador y pidi'e pa sigui guia nos riba e bon caminda pa por realisa cosnan grandi pa Aruba." Despues a sigui ponemento di e 'penchi' unda e tereno di e proyecto ta wordo deliñea, indicando asina cu e proyecto a start sali.

Expresionnan haci den e articulo aki no necesariamente ta refleha opinion di ArenaPoliti.co