Minister Sevinger durante inicio di Smart Community Aruba. 

ORANJESTAD - Minister di Infrastructura y Integracion Benny Sevinger a mustra su aprecio y orguyo ora a duna e señal di start pa 'Smart Community Aruba' dialuna atardi, poniendo e penchi unda e tereno a keda delinea. Den su discurso dilanti un cantidad grandi di invitado na Kibaima, unda e 20 viviendanan ta keda construi, el a gradici Prome Minister pa su vision."Un vision cu tur dia e ta dun'e su contenido, un vision cu cada dia e ta bira mas visibel."

Den e bario pintoresco di Kibaima e 20 viviendanan cu hunto ta forma e proyecto 'Smart Community Aruba' ta wordo construi segun e tecnologianan mas moderno y avansa riba tereno di sostenibilidad. Pa por biba den un di e casnan esnan interesa por inscribi na FCCA y eynan ta haci e seleccion. Esaki ta bay segun un procedura cu FCCA a introduci.

Minister Sevinger: "E proyecto a tarda un poco pa start, pero manera ta wordo bisa 'tur cos bon tin su ora pa cuminsa'. Nos ta contento cu awe nos ta dal e prome paso pa e proyecto start sali. Aki 11 luna, na tempo, nos ta bolbe para aki pa tuma e yabi di e prome cas pa asina e prome ciudadano di e proyecto por drenta aden." Sevinger a bisa cu pa Infrateam e proyecto ta un otro paso importante. "Ora e vision 2020 a bin dilanti, den oposicion caba y bou guia di nos actual Prome Minister Mike Eman, a tuma e reto cu cada granito cu pone pa cana den e direccion ey, ta pa contribui na un miho Aruba. Den esaki 'Smart Community Aruba' ta hunga un rol importante, no solamente pa nos generacion, pero principalmente pa futuro generacionnan cu tin cu siña biba miho cu nos y construi miho cu nos. Pa nos di Infrateam innovacion ta halto riba agenda y tin un concentracion grandi riba e tema aki. Na DOW esaki sigur ta e caso." Minister Sevinger a mustra riba Green Corridor cu ta bayendo San Nicolas cu tur tecnologia nobo cu tin, mescos ta pasando den e barionan cu gobierno ta renobando unda ta crea mas espacio pa publico. Algo cu antes no tabatin, pasobra tabata crea espacio pa auto so. "Esaki ta e cambio cu a bin cu sostenibilidad. Crea infrastructura pa hende cu ta miho pagabel y miho den calidad."

Expresionnan haci den e articulo aki no necesariamente ta refleha opinion di ArenaPoliti.co