Na man di Minister Eman e mundo na Aruba ta bira parobes. E mandatario ta usando tur recurso limita di nos Pais pa asina por engrandece su propio ego bou di e farce di vision 2020. No tabata suficiente cu Minister Eman a permiti Minister Sevinger haci deshaci cu tereno na nos Pais, awor Minister Eman ta bira traspasa tereno pa FCCA traha casnan di smart community pa asina Minister Eman por lombra wowo di mundo cune. Di e manera aki Minister Eman ta stroba e tantisimo famia hoben cu ta buscando un cas, un tereno of un hypoteca pagabel pa por yega na nan propio hogar. 

Famia hoben den apartamento y FCCA ta traha cas pa Eman 
Pa yega na bo propio cas na Aruba cada dia ta bira mas dificil. Ta dificil pa haya tereno via Gobierno, tin mas di 11 mil peticion! Ta dificil pa haya tereno cumpra, pasobra mayoria biaha real estate ta bende tereno na un prijs exorbitantemente halto. Banda di esaki a para bira cu si bo no ta sostene AVP, bo no ta haya tereno. Busca un cas via FCCA tampoco no ta facil. Hopi ta comenta cu e hypoteca tampoco no ta asina pagabel pa un famia hoben cu awor ta cuminsa. Pa e motibo aki hopi famia hoben na nos Pais ta haya nan ta biba den apartamento, trailer of den camber na cas di famia. Anto den e situacion aki e ta un bofta den cara di tur e famianan hoben aki pa mira cu enves cu Minister Eman y FCCA ta haci algo pa yuda nan yega na nan propio cas, bo ta haya FCCA ta bay construi 20 cas cu no ta social djies pa yuda Minister Eman haci su locura di vision 2020 posibel.

Smart Community no ta necesidad
Cu mas di 11 mil peticion pa un tereno, e ta un falta di respet enorme di Minister Eman pa bay traspasa tereno schaars pa FCCA djies pa nan por traha 20 cas na e Smart Community na Kibaima cu e meta pa bay lombra wowo di mundo cu e farce berde y sostenibel di Minister Eman su vision 2020. E casnan aki cu tur e technologia nobo cu kier hinca den nan NO lo ta casnan cu un prijs pagabel pa un famia hoben por paga. NO ta casnan social nan lo bira conforme e meta pa cual FCCA ta traha cas na nos Pais. Ta bisto cu e casnan aki ta wordo traha djies pa complace e locura di Minister Eman y eynan ta na unda na nos parecer FCCA ta faya barbaramente den cumpli cu nan deber y meta pa cual e fundacion aki a wordo institui. Casnan social y na un prijs pagabel, esey ta e meta di FCCA y no casnan cu technologia avansa pa Smart Community cual no ta un necesidad y cu lo por wordo cumpra of gehuurd solamente pa esnan cu mas poder financiero. 

Famia hoben na promer lugar 
Ta yega ora pa mas hende realisa cu nan no por keda usa e recursonan limita di nos Pais djies pa complace e locura berde di Minister Eman. Den e caso di FCCA mester a duna prioridad na e famianan hoben di nos Pais pa nan por yega na nan propio cas promer. Traha 20 cas na e Smart Community djies pasobra cu Gabinete Eman no tin placa pa Gobierno mes traha e casnan, no por ta mas importante cu yuda e famianan hoben di nos Pais yega na nan propio cas y na un forma pagabel. Ta e famia hoben mester ta na promer lugar y no e Smart Community cu su casnan di technologia avansa cu Minister Eman kier bay lombra wowo di mundo cune.

17 juli 2016

Expresionnan haci den e articulo aki no necesariamente ta refleha opinion di ArenaPoliti.co