Un biaha mas nos por a scucha Prome Minister Mike Eman y Minister Benny Sevinger durante tratamento di Presupuesto 2016 bisa, cu Gobierno lo bai traha 1000 cas Social den aña 2016 y 1000 Cas Social (Cas di Pueblo) den aña 2017.

Atrobe nan ta priminti mientras cu nan sa cu ta un berguensa grandi cu un Gobierno cu a haya un sosten amplio di e Pueblo cu 12, despues hasta 13 ASIENTO, den casi 7 ańa di Gobernacion ainda no por a traha ni un Cas Social pa Pueblo!
Den e programanan di Gobernacion cu AVP a campanja cune 2009 bin ariba a priminti nos Pueblo cu lo bai traha hopi Cas Social pa Pueblo, y Cas pa Anciano (nos Grandinan) den kada Bario. Ta berdad cu e Politiconan y Partidonan Tradicional ta bon pega cu e Lema di “Campaña ta Un y Goberna ta otro”.

Den Parlamento Minister Sevinger a declara cu na FCCA tin un lista di mas cu 3000  hende sperando pa un Cas Social y nan lo bai traha hopi Cas prome cu nan periodo termina. E no a bisa sí cu por ta Cas di Foam of ta Cas di Carton.

Minister Sevinger y Eman mester ta mas serio cu e Pueblo y si nan no sa con pa traha casnan social nan por pidi nan Colega di partido actual Presidente di Parlamento Sra. Tromp pa siñanan ta con ta logre. Pasobra tempo cu e Presidente tawata Minister e si a demostra y a zorg pa reserva Placa den Presupuesto pa traha Cas Social.

Pa FCCA traha cas Social, FCCA mester hanja tereno prepara, rosá, hasi limpi for di gobierno pa construi vivienda. Pa verkavel un tereno ta dura hopi tempo prome cu por keda cla cu e verkavelingsplan, mester tene cuenta cu trahamento di mapa, midi tereno, tuma contacto cu companja nan estatal manera Elmar, WEB, y Setar etc. etc. E pregunta ta keda, ta con liher Gobierno di Mike Eman II lo por keda cla pa entrega na FCCA e Terenonan aki?

Den pasado nos por corda con e ruman di Prome Minister, dus ex-Minister President señor Henny Eman cu tawata den gobierno e tempo ey a bisa, “si mester midi cu Linja di Plastic, pa pone Penchi ban hasiele”.

No por ta asina cu FCCA no por hanja un verkavelingsplan pa traha cas Social pa Pueblo, y un tal Roberto Rincon cu a hand deliver (!) un peticion pa erfpacht den cual e ta claim cu e ta supuestamente un “beneficial owner” di un compania, den apenas 4 dia si a haya OK per direct, anto mas cu 4000 m2 firma dor di Minister Sevinger! Con por ta posibel? Ta ki tipo di maneho di privilegio esaki ta? Con un persona cu no ta estableci na Aruba, ni tin permiso di admishon permanente, ta djies claim di ta un “beneficial owner” di un compania y e ta bin na remarca pa haya tereno erfpacht den un par di dia? E peticion di sr. Rincon ta ni cumpli cu articulo 4 di e Landsverordening Uitgifte Eigendommen, paso te cu mi sa e no ni ta riba zegelpapier! Increibel!

Pues Gobierno tin casi 7 aňa ta patch up, pone verf cu fotografo aserca, pero a lubida di traha casnan social nobo. Ta un engaňo grandi y manipulacion total ta tumando lugar. Te ki dia e mas cu 3000 persona humilde cu ta riba lista di espera lo yega na turno pa por biba cu nan famia den un cas y bario cu por brindanan trankilidad y un mehor porvenir?

Wel mi ta termina bisando cu boso sosten y confiansa PDR si lo cumpli pa percura pa traha casnan adecuado y pagabel pa e Pueblo di Aruba. Democracia Real ta e alternativa.

Ing. Alonso Tromp di PDR, Email: This email address is being protected from spambots. You need JavaScript enabled to view it., Cell.: +297 5930011

Expresionnan haci den e articulo aki no necesariamente ta refleha opinion di ArenaPoliti.co