Henter e siman aki nos por a sigui tratamento di presupuesto 2016 cu hopi atencion. Den e proceso aki tur fraccion ta ricibi e oportunidad pa haci preguntanan por escrito na gobierno kende na su turno mester contesta esakinan  por escrito tambe. Aunke boycoteando gran mayoria di pregunta gobierno a indica cu lo trata esaki durante reunion den parlamento pero atrobe no a cumpli. Pero den e parti di contesta # 17 cu ta toca FCCA a wordo splica cu tin un lista di 3060 famia inscribi en espera di un cas social di FCCA. Tambe a splica e maneho di FCCA ta depende riba dos aspecto porcierto, como number uno terenonan di erfpacht disponibel cu gobierno lo traspasa y number dos ta pa haña prestamo na interes hopi abou. Den cuadro di sincronisa e dos puntonan menciona lo por traha 250 cas pa aña. Pues si resumi e informacion aki por conclui cu te aki 12 aña na 2028 e ultimo personanan riba e lista aki lo por haña un cas. Mesora e pregunta cu ta bin ariba ta dicon Benny a percura y a firma pa e amigo multi miyonario di AVP Roberto Rincon haña un tereno erfpacht di casi 4000m2 den apenas 3 pa 4 dia di trabao? Dicon FCCA no ta haña tereno? Ki preferencia Roberto Rincon tin riba nos humilde y digno pueblo? E homber chikito mester pasa un caminda di cruz wantando tur sorto di insulto bringando pa su derecho mientras e miyonario ta drenta Bo oficina y ta hand deliver minister Benny un carta y mesora ta sali bek cune firma “dezerzijds accoord”.  Esaki ta corupcion di marca mayor mientras pueblo ta  sclamando pa un pida dak. Mester recorda AVP cu bou maneho di MEP cu tanto nan ta critica creando un percepcion robez den pueblo, MEP a logra traha  190 cas social na Bushiri, 120 cas na Cura Cabay, 30 cas na Seroe Patrishi, 60 cas na Jaburibari, 144 cas na Palisia Weg. Pa esnan cu limitacion MEP a traha casnan adapta na Sjabururi, Ambiente Feliz y Jaburibari. Mester accentua cu a renoba y amplia Sint Michael Paviljoen pa nos grandinan. Pues si AVP ta honesto cuminsa traha di berdad pa pueblo y stop di malgasta placa di pueblo den proyectonan pa enrikece boso mes. MEP un partido Social Democrata unda e ser humano ta central. MEP  ta priminti y MEP lo cumpli cu pueblo unavez den gobierno lo acelera proyectonan di casnan social.

Expresionnan haci den e articulo aki no necesariamente ta refleha opinion di ArenaPoliti.co