Mientras cu San Nicolas ta pasando den e momentonan di mas dificil den historia di Aruba por tuma nota cu ademas di esaki San Nicolas a wordo engaña barbaramente pa politiconan di AVP. Despues di ceramento di Refineria cual a causa un impacto social economico gigantesco, San Nicolas ta enbusca di alternativa. Cuponan di trabao ya no tey mas. Negoshinan cu tabata florece cu e spin off effect di Valero y tur e contratistanan alrededor tampoco no tey mas. Negoshinan a cera y otronan a muda pabao di brug.  Mientras cu AVP a inverti MIYONES y MIYONES pabao di brug, San Nicolas a haña apenas un Carnaval Village cual porcierto ta wordo usa un biaha pa aña y no a crea ni (1) solo cupo di trabao. Economia na San Nicolas ta den “coma”. Sinembargo durante campaña na 2013, pa ta exacto den luna di Juli 2013,  Mike Eman y Mike de Meza a lansa un proyecto masha bunita pa San Nicolas. A priminti un plan di mehoracion di e bario Diamantbergweg na e habitantenan. Esaki no ta tur. Cu un bunita presentacion di powerpoint a pinta un scenario masha bunita unda AVP lansa su promesa cu lo traha un verkavelingsplan riba e tereno net patras di e misa na Grote Bergweg pa traha casnan social mediante FCCA. Tur esakinan a cay den masha bon tera cerca habitantenan y a compromete nan mes pa duna AVP sosten un biaha mas. Aunke no ta promer biaha AVP ta gaña San Nicolas paso na 2009 tambe Otmar Oduber a priminti Airport chikito y Boutique Hotel na San Nicolas y awe 6 aña despues net net nada.  Realidad di bida nos por mira awe cu Mike Eman y Mike De Meza tabata demasiado ocupa cu nan amigo intimo Roberto Rincon ta wine and dine manera corant “Awe Mainta” a skirbi algun dia atras y a lubida completamente riba casnan social priminti na habitantenan di Diamantbergweg.  Mas tristo ta cu den nan contesta pa ta exacto number # 14 cual porcierto lo wordo trata e siman aki den Parlamento, AVP ta bisa textualmente ”er zijn momenteel geen financiele middelen beschikbaar voor dit project”. Pues indirectamente San Nicolas por wel di lubida.  Esaki ta un bofta den cara di San Nicolas y muy en particular habitantenan di Diamantbergweg. Pa otro proyectonan manera Watty Vos Boulevard tin 442 miyon, pa 4 baansweg tin 750 miyon, tin 990 miyon pa bijbouw di Hospital, tin 80 miyon pa tram y Caya Betico Croes, tin 30 miyon pa Linear Park y tin den plan mas di 250 miyon pa Molina di biento Urirama. Dicon no por a aloca apenas “2.5 miyon” pa e proyecto aki pa  San Nicolas di acuerdo cu boso mesun project dossier? Unda Lorna Casandra Varlack ta? Unda Alvin Alfonso Howell ta? Unda Melvin Atanacio Tromp ta? Unda Christian Gerard Dammers ta? Unda candidatonan di San Nicolas a keda pa defende San Nicolas? Entre otro boso ta cla pa grita “Voor” e siman aki den parlamento tracionando San Nicols? Kisas boso ta corda solamente riba boso salario y pensioen? Foei !!! Momento a yega pa STOP di vota pa amigo of promesa falso. San Nicolas ta tempo pa deposita Bo confiansa den un partido cu SI lo cumpli cu Bo. Desaroyo y inversion real di pais Aruba mester conta Pa Bo tambe. Ban uni pa hunto nos prospera. San Nicolas Bo merece mihor.

Expresionnan haci den e articulo aki no necesariamente ta refleha opinion di ArenaPoliti.co