Minister Oduber ta haci anuncio oficial di proyecto di buoynan. 

Dialuna mainta den un momento simbolico y hopi importante Minister Otmar Oduber hunto cu representante di TPEF, DIP, ATA, Directie Scheepvaart y Mariteam Politie tabata presente na Arashi pa oficialmente anuncia un proyecto di buoys na nos beachnan. E proceso cu a inicia pa loke ta trata Beach Policy y henter e reglamentacion di loke ta tuma luga riba nos beach ta trece cu ne hopi cambionan. Ta hopi importante cu tur hende cu ta uza nos beachnan tanto local y bishitantenan sinti nan mes mas sigur na nos beachnan. Tur  locual ta pasa na nos beachnan y lama tin efectonan directo pa nos como isla mirando cu nos beachnan ta un di e instrumentonan cu nos ta uza pa atrae nos turistanan. Pues ta importante pa tin regla pa protehanan. Prome cu a implementa e Beach Policy tabatin diferente reunionnan cu a tuma luga y awor poco poco ta bay tin diferente aspecto di cambionan entrante prome di juli. E maneho cu a keda introduci y aproba den Conseho di Minister y cu Gobierno ta anunciando den e ultimo añanan caba unda cu lo ta bay tin diferente reglamentacion riba nos beachnan, pero tambe e aspecto di control cu tin cu tuma luga door di diferente instancianan entre otro Cuerpo Policial, Directie Scheepvaart hunto cu DIP y otronan cu ta percura pa e organisacion tin e parti structural riba nos beachnan. Dialuna na Arashi  a tuma luga inauguracion di e proyecto di buoynan cu ta cana man den man cu introduccion di Beach Policy. Un inversion di TPEF - Tourist Product Enhancement Funds. Segun Minister Otmar Oduber asina ta marca e area unda cu e personanan por landa trankilo y unda e actividadnan riba lama por tuma luga. A crea facilidadnan adecuado na Nikky Beach y awor na Eagle Beach cu ta netamente pa por baha e presion cu tin riba e areanan di hotel na Palm Beach. Hopi di e bishitantenan crucero ta wordo hiba na Arashi tambe cu ta afecta e aspecto di siguridad mirando e cantidad di hende cu ta bin haci uzo di e beach aki y na unda cu e bista di e polisnan cu mester tene cuenta riba e desaroyonan cu ta tuma luga riba lama por mester tin un miho bista. Segun e mandatario hunto cu e Beach Policy a percura tambe pa e infrastructura creando mas accesibilidad pa esnan cu mester controla riba lama. TPEF cu ta e fondo cu ta percura pa e buoynan pa e cuatro diferente boca di lama, Malmok, Arashi, Boca Catalina y Baby Beach, un total di casi 150 mil florin den inversion pa siguridad di nos localnan y bishitantenan, pero alabes esnan cu ta haci diferente actividadnan riba lama lo por haci esaki den un parti save tambe. Pero banda di e proteccion pa e usuarionan di lama nos tin cu percura pa salvaguardia e naturalesa y beyesa di nos awanan. A bira un custumber cu botonan di actividad acuatico ta staciona hopi cerca di canto sin pensa riba e coralnan cu ta den awa. Nos tin cu percura pa e joyanan natural aki por keda bibo pa e generacionnan cu ta bin despues di nos. Cu e buoynan awor e areanan ta miho defini y ta trece cu ne cambionan positivo den tur aspecto.  

Maritiem Politie ta pone nan mes disponibel pa cualkier pregunta riba e reglanan y maneho nobo pa cu nos beachnan y tambe pa e areanan miho defini awor riba lama. Por yama na telefon 5881896 of 5975125 si tin cualkier incertidumbre. Cu un miho coordinacion den esaki ta nos tur lo beneficia. Un pabien na ekipo grandi di Ministerio di Turismo, TPEF, ATA, DIP, DOW, KPA Maritiem Politie y Directie Scheepvaart cu pa un tempo largo a sinta na mesa cu otro unda awe nos ta cuminsa mira e fruto di e bon trabao cu a eherce pa percura pa mas siguridad riba nos beachnan y den nos awanan.

Expresionnan haci den e articulo aki no necesariamente ta refleha opinion di ArenaPoliti.co