Siman pasa Minister Bermudez a presenta na Parlamento pa asina atende cu e Cuenta Anual di 2014 di nos Pais. Den e reunion aki nos a repasa tur locual a pasa na 2014 pa por corda e Pueblo cu aña 2014 tabata yena di crisis financiero y di berguensa cu te ainda tin su efecto riba nos Pais.

Berdad financiero a sali na cla
Pa largo tempo Minister Eman a tapa y manipula cu e cifranan di nos Pais pa asina Pueblo no haya sa con malo su gobierno ta manehando nos finanzas publico. Minister Eman a bay asina lew di hasta firma un Acuerdo di Diahuebs Santo na 2013 den cual ela acorda cu Hulanda lo bin cu un supervicion financiero a cambio di un saco di placa pa e por keda na poder. Pero den 2014 Minister Eman su bingo a hunga ya cu ela presenta un presupuesto sin tene na cuenta e acuerdonan haci cu Hulanda. E carta di ‘geen bezwaar’ pa supervicion di Minister Yrasquin tambe a hunga rol. Y asina bou precion di Hulanda, CFT a drenta, tira bista riba cifranan di nos finanzas publico pa despues expone e berdad financiero di nos Pais den un rapport. Aña 2014 a mustra nos con Minister Eman largo tempo a gaña Pueblo e situacion real di nos finanzas publico.

Gobernador ta wordo ofendi
Ta bisto cu nos Pais ta bayendo perdi pa mal gobernacion. Pa evita un desaster mas grandi, Gobernador a pone un paro door di no pone su firma bou di e presupuesto tanten cu no tin claridad financiero. Minister Eman enves di recapacita, a bira ofende Gobernador cu un welga di hamber den porta di su oficina y a manda su hendenan pa manifesta y hasta instiga contra Gobernador. Esaki por wordo categorisa como e berguensa di mas grandi di e historia di nos Pais. Un Minister President cu kier muri enves di acepta cu e ta esun responsabel pa malogra nos Pais financieramente te na e extremo di entrega nos autonomia financiero na Hulanda firmando pa supervicion financiero.

Minister di Finanzas ta tuma su retiro
Otro berguensa tabata pa mira Minister di Finanzas Yrausquin tuma su retiro pidiendo Minister Eman pa asumi su responsabilidad. E ex mandatario a pidi Minister Eman pa no pasa e cuenta di mal gobernacion pa e generacionnan nos dilanti y tampoco laga e autonomia cu nos grandinan a lucha pe, bay perdi. Ela pidi Eman pa gara e toro na su cacho. Di e manera aki e mesun colega a confirma cu Minister Eman su welga di hamber tabata un farce y cu Eman a entrega e lucha y e futuro di nos yuinan djies pa keda na poder. Esaki ta un berguensa!

Tardansa y inseguridad
Tur e drama di welga di hamber, manipulacion, ganiamento, tardansa den fiha un presupuesto di 2014, a cea un inseguridad grandi cu te dia di awe tin su efecto. Minister Eman a crea un crisis cu su ganiamento cu a desemboca den un desconfiansa cu hasta a tranca nos economia cu un crecemento di 0,0% den 2015. Esaki ta prueba cu e crisis y e berguensa cu Eman a hinca nos Pais aden na 2014, te ainda tin su efecto.

19 april 2016

Expresionnan haci den e articulo aki no necesariamente ta refleha opinion di ArenaPoliti.co