E ta bisto y obvio cual ta e maneho cu minister Sevinger a hiba e ultimo anjanan pa loke ta tereno. Pueblo mes no a bin na remarke pa haya tereno, FCCA no a bin na remarke pa haya tereno pa traha casnan social pero amigonan, sponsornan y te hasta coordinadornan si a bin na remarke pa haya tereno pa despues pone esakinan na benta. Na momento cu tin un lista di espera di 11,000 persona pa haya un pidi tereno pa construi un cas, bo tin un lista di espera di 3000 persona pa bin na remarke pa haya un cas na FCCA nos tin cu puntra nos mes interes di kende Benny Sevinger a sirbi. Un politico mester sirbi interes general, e mester sirbi interes di pueblo y no su mesun interes of interes di amigonan, sponsornan of coordinadornan.

Cada biaha e escandolonan rond di partimento di tereno/patrimonio di pueblo ta birando mas grandi. Ta un berguenza cu un minister ta trata pueblo di e manera cu e la wordo trata y otronan pasobra nan tin placa ta haya un trato diferente. Envez cu e minister recapacita e kier ta wrong and strong. Na un manera masha fresco y arrogante minister Sevinger a bisa den parlamento cu e NO TA CARE si pueblo no a haya tereno y si pueblo no a haya casnan social. Su palabranan tawata: I DON’T CARE, riba e preguntanan dikon e lista di esnan cu a pidi tereno ta asina largo y dikon gobierno NO a construi ni 1 cas social e ultimo 7 anjanan. Pa haci e situacion aun mas fastioso den mesun reunion Benny Sevinger a bisa parlamento cu si ta su amigonan ta e uniconan cu a haya tereno pa despues bende esakinan, SO BE IT. Ki clase di mentalidad mezquino esaki ta di un minister cu na un forma arrogante ta bisa cu e no ta worry pa sirbi interes di pueblo y e no tin cuenta cu ta su amigonan so a haya tereno pa despues bende esakinan.

Nos mester recorda e minister aki cu na momento un inversionista pidi un tereno, e ta pa desaroya esaki. No por ta asina cu hendenan rond di minister Sevinger ta pidi tereno pa loco pa despues promer cu aktenan pasa notario ta pone esakinan na benta cu Venezolanonan. Tin un amigo hopi yega na Benny Sevinger cu su so a haya mas cu 7 tereno. E maneho aki ta uno inhusto y sin hustica ta funciona riba e pida baranca aki hopi ta esnan cu lo mester wordo investiga pa locual nan ta hacienda cu patrimonio di pueblo.

Awor cu Benny Sevinger a caba di haci y deshaci diripiente kier camba e ROP. E ta logico cu e kier cambia e ROP pasobra ta un cantidad di tereno a wordo duna den zona ‘’berde’’ y si no cambia e ROP, e Venezolanonan cu ta cumpra tur e trenonan serca e amigonan di Benny Sevinger no por bin cu ningun desaroyo. E cambio di e ROP no ta ningun cambio cu ta necesario pero e cambionan ta mas bien dirigi pa acomoda maneho di minister Sevinger y tambe pa acomoda e parke di Molina di biento na Urirama cual tambe ta den zona berde.

Siman tawata den parlamento un planoloog Hulandes cu a wordo contrata pa haci e cambionan necesario. Nos mester constata cu si Benny Sevinger a hiba un maneho drechi, a respeta regla, a respeta ley y mas aun a respeta sentencia di huez awe no mester haci ningun cambio di e ROP. Ora ta fiesta cu patrimonio di pueblo y haci deshaci bo ta haya tipo di decisionan asina aki.

Expresionnan haci den e articulo aki no necesariamente ta refleha opinion di ArenaPoliti.co