Diamars mainta Minister Oduber conhuntamente cu su consehera Indra Zaandam a reuni cu Ateliers'89 riba diferente proyecto y ideanan pa reenforsa e aspecto Artistico y Cultural di nos isla. A delibera riba proyectonan manera Caribbean link cu pa varios aña ta andando unda ta duna varios artista den nos region Caribe e oportunidad pa yega hunto pa intercambia experiencianan explora y crea arte. Sra. Indra Zaandam ta indica cu e region Caribense tin artistanan no solamente renombra pero cu potencial maximo. E bunita di e proyecto aki ta cu na Aruba e ora nos lo tin e honor di tin artistanan cu ta familiar cu e caracteristicanan Caribense pero ta uza Aruba como inspiracion pa crea arte. Durante e reunion a papia riba e diferente posibilidadnan riba e vision di e combinacion di Turismo y Cultura. Nos bishitantenan mas y mas ta pidi pa productonan autentico di nos isla. Den hopi caso e bishitantenan aki ta haya nan caminda pa Ateliers'89 y ta keda asombra pa e arte contemporaneo cu tin, demostrando asina e calidad di nos hendenan talentoso. Artenan cu mester por haya mas espacio riba nos isla. Mirando e posibilidadnan y kico ta e necesidadnan a toca e tema di 2 "City Tours". Lo enfoca riba e turistanan den v-car of turistanan di crucero cu ta bishita nos centro di ciudad lo por sigui un tour artistico autentico y lo kier traha un tour similar tambe pa San Nicolas. Ta bon conoci cu San Nicolas tin tur e ingredientenan pa ta nos ciudad di nos herencia cultural. Den esaki ta resalta tambe e parti artistico. San Nicolas tin e caracter perfecto pa combina Turismo cu Cultura, no solamente pa nos bishitantenan pero tambe pa nos propio hendenan local. Kier traha pa combina proyectonan andando pariba di nos isla cu Ateliers'89, pero tambe cu otro organisacionnan riba nos isla. Na september lo colabora cu Aruba Art Fair Foundation, pa crea e luna di Arte na Aruba. Vision ta pa traha cu diferente partner riba nos isla, creando un combinacion di colaboracion, unda tur ta traha hunto na beneficio di Cultura di Aruba.

Na mes momento e consehero di Ministerio di Cultura ta duna un palabra di elogio pa Ateliers'89  cu ta un ekipo multifacetico cu ta consisti di personanan den mundo artistico pero tambe den sector priva y ta traha duro pa engrandece nos cultura.

E potencial di beneficia economicamente di cultura y arte tabata un otro punto riba e agenda di e reunion. Na momento cu papia di un "Artistic City Tour" mester pensa riba e turista cu lo kier come algo, of kier cumpra un producto local, y di e forma aki lo por sostene tambe e empresarionan chikito cu kisas no tin e forma pa mercadea nan producto den grandi pero lo por haya un sosten cu e tipo di tournan asina. E potencial di crea arte pa beneficio economico ta keda bin dilanti. Sra. Zaandam ta splica cu e rol di Ministerio di Cultura ta pa reenforsa proyectonan Artistico y Cultural, creando un ambiente y espacio pa tipo di organisacionnan manera Ateliers'89, fortalece nan mes cu partnernan strategico. Ministerio ta motiva y stimula sector priva pa ta mas envolvi den e aspecto cultural di nos isla. Tin varios proyecto na caminda pa asina sigui engrandece e aspecto artistico y cultural riba nos isla.

Expresionnan haci den e articulo aki no necesariamente ta refleha opinion di ArenaPoliti.co