ORANJESTAD – Diabierna ultimo Gobierno di Aruba a firma un “Aliansa di Inovacion” cu Philips pa asina duna inicio na ehecucion di proyectonan di iluminacion den edificionan y areanan publico riba nos isla. “Na april 2014 Gobierno di Aruba a firma un Memorandum of Innovation cu Philips,” minister Mike de Meza a splika. “Awe nos ta hopi entusiasma di por a formalisa nos aliansa pa asina maximalisa e eficiencia den iluminacion den 35 edificio publico, como tambe instalacion di fuentenan di lus pa Plaza Padu y Paardenbaai Plaza.

Ta importante pa menciona cu e “Aliansa di Inovacion” entre Aruba cu Philips ta sirbi dos proposito. Na prome lugar e ta contribui na actividadnan economico riba nos isla. “Durante e ultimo aña, Philips a selecta contratistanan local specialisa den iluminacion pa ehecuta e trabownan acorda. Durante un periodo di casi cinco aña e proyecto aki lo percura pa empleo pa tecniconan local riba e tereno di iluminacion, instalacion y mantencion,” Minister de Meza a splika.“Na final di e proyecto aki, nos no ta keda solamente atras cu iluminacion eficiente y inovativo, pero nos tecniconan lo keda cu expertisio y conocemento di tecnologianan di Philips.”

“Philips ta masha interesa tambe pa desaroya nan actividadnan den nos region for di Aruba”, segun Minister de Meza. “Pa Philips ta prome biaha cu ta uni tecnologia, innovacion y capital den un proyecto.” Philips ta uni su mes awor na instancianan manera TNO, Port of Amsterdam, Arbo Unie, STC cu for di Aruba lo brinda nan servicionan pa region for di Aruba. Di es manera aki e aliansa di innovacion ta sirbi un di dos proposito importante. E proyectonan cu Philips ademas ta permiti pa Aruba bira un showcase regional pa e compania aki su productonan innovativo, como tambe lo sirbi como un centro di excelencia pa Philips desaroya y test productonan y practicanan sostenibel.

Philips ta bay introduci tecnologianan eficiente pa e edificionan di gobierno cu ta resulta den reduccion significante di gastonan di coriente. “Den teoria loke gobierno por spaar na uzo di coriente den su mesun edificionan por facilmente financia e iluminacion di e proyectonan di e dos sitionan iconico menciona anteriormente,” Minister Mike de Meza a splica. Philips a bira un partner strategico pa Aruba den reduccion di uso di energia y na final di dia contribui na e meta pa Aruba yega na 100% independencia di combustibelnan fosil pa produccion di awa y coriente.

Expresionnan haci den e articulo aki no necesariamente ta refleha opinion di ArenaPoliti.co