E mercado pa trabou cu a wordo teni diasabra pasa a atrae hopi hende cu ta interesa pa traha. Tanto hende hoben como hende di mas edad tabata presente y a mustra un gana grandi pa traha. For di combersacionnan cu a tene durante di henter dia cu hendenan cu a bay busca trabou, por a saca algun conclusion importante. Tur e conclusionnan ta mustra riba e importancia di enseñansa pa haya trabou, di e tipo di trabou pa haya un bon entrada y cu e nivel di entrada cu bi haya di e trabou ta determina pa un gran parti e calidad di bida cu bo tin.

ENSEÑANSA
E prome conclusion cu sigur por a saca ta cu tin mucho hopi hende ta busca trabou cu no a caba nan scol of cu tin mucho poco preparacion pa haya un trabou den un mercado cu asina hopi competencia. E echo aki ta mustra con importante ta pa caba scol y percura pa bo tin un diploma of un ofishi pa bo por haya trabou. E ta mustra tambe con importante ta pa scolnan, directivanan di scol y gobierno, pone tur atencion posibel pa retene hobennan den scol te ora nan haya nan diploma of ta domina un ofishi. Sin esey nan chens pa haya un trabou ta simplemente mas dificil den un mercado cu tanto hende cu si tin un diploma of experiencia profesional. Gobierno, su departamentonan di enseñansa y scolnan mester haci mas pa percura pa tur mucha caba scol y niun sali di scol sin un diploma of ofishi.

AMPLIA INTERES Y CAPACIDAD
Un didos conclusion cu por a saca ta cu tin hopi hende cu tin of tabata tin un trabou, pero cu a perde esaki pasobra nan no a sigui desaroya nan mes. Den cualkier ramo di trabou, bo no por keda pensa cu e trabou ta keda pa semper mescos. Bo no por pensa cu ora bo sali di scol cu bo no tin cu siña mas. Den tur ramo y den tur ofishi tin cambionan ta tuma luga cu ta rekeri pa hende sigui studia, sigui capacita nan mes pa keda capaz di haci e trabou aunke e profesion ta cambia. Tambe ta riparabel cuanto hende a keda solamente den un ramo di trabou y no a amplia nan interes, capacidad y experiencia. Den un mercado laboral awendia, ta necesario pa nos amplia nos capacidad y siña haci otro ofishi y trabou tambe. Esaki ta haci cu e chens pa haya trabou ta mas grandi.

CHEAP LABOR
Finalmente, e ta obvio cu mester sigui combati e fenomeno di "cheap labor" den tur forma y tur caminda. Loke "cheap labor" ta haci entre otro, ta cu e ta haci mas dificil pa un hende cu hasta tin diploma y experiencia haya trabou, pasobra tin otro hende cu den forma illegal, sea sin permiso of cu ta ofrece pa haci trabou na prijsnan mucho abou, ta causa cu ta bira hopi mas dificil pa hendenan profesional haya trabou. No pasobra nan no lo por of kier haci un trabou. Pero pasobra otro hende ta ofrece pa haci e trabou pa hopi menos placa. E competencia inhusto aki ta daña pa nos tur aki na Aruba. Pa hoben y hende mas grandi e ta un fuente di frustracion cu mester sigui combati den tur forma y tur caminda den mercado laboral na Aruba.

Expresionnan haci den e articulo aki no necesariamente ta refleha opinion di ArenaPoliti.co