ORANJESTAD – Tanto Minister di Infrastructura, Benny Sevinger como henter Gabinete Mike Eman II no ta sordo ni ciego pa e ciudadanonan cu ta expresa nan malcontento ora cu construccion, renobacion of mantencion ta wordo haci cerca di nan cas of negoshi. Hunto cu DOW ta purba di haci e trabounan di e manera mas eficiente y cu menos molester posibel. Asina mes, y manera Minister Sevinger mes ta bisa: “no tin otro palabra cu pidi pasenshi y cooperacion pa esaki tuma luga, pero atrobe, e ta na bienestar di nan mes y Aruba en general y esey ta loke nos ta mira como prioridad.”

E mandatario ta consciente cu criticanan ta algo cu ta bay keda haya. Den e caso di renobacion di e sistema di riolering na L.G. Smith Boulevard, banda di Certified, DOW a papia cu tur den e zona di antemano. “A papia cu e hendenan prome cu nos a cuminsa, duna nan tambe e schedule di cuanto tempo nos ta premira cu e trabou aki ta dura y duna nan tambe alternativa pa cliente por sigui yega na e tiendanan ey,” Minister Sevinger a splica y e proyecto ta canando segun schema, segun director di DOW, Ing. Marlon Croes a confirma.

Situacion similar ta presentando caba na e proyecto di Green Corridor cu ta bay tin un duracion di dos aña y apenas ta den su di prome. Gobierno sa cu bisiñanan ta keda afecta pa e stof, desordo y otro molesternan pero esaki ta loke nan no ta scapa di nan. Minister di Infrastructura: “E ‘Landsbelang’ ta loke ta conta, pero atrobe, ta purba di tene cuenta cu tur hende y nos ta haci esey, pero asina mes e no por ta 100%.”

E proyecto di Watty Vos Boulevard/Ringweg 3 ta bay pasa den diferente bario y ta un proyecto di dos aña y mey  pa casi tres aña di construccion. Minister Sevinger sa cu Gobierno no ta bay keda sin haya critica pasobra, “semper lo tin un persona cu ta bay bisa cu e no por a yega na su cas awe of ‘mi negoshi cliente no por a yega.’ Tur esaki e ministerio y departamentonan ta tene na consideracion, “pero na final ta un proyecto pa pais Aruba cu ta bay hisa e nivel di bida tanto pa esnan cu tin e molester, como tambe pa pueblo en general y ta pesey bo ta haci’e.”

Expresionnan haci den e articulo aki no necesariamente ta refleha opinion di ArenaPoliti.co