Proyectonan bou tera tin biaha ta mes of mas importante cu esnan riba tera 

ORANJESTAD – Diahuebs mainta Minister di Infrastructura personalmente a bay na sitio di construccion pa inspecciona con e trabounan di proyecto di renobacion di sistema di riolering di Oranjestad ta avansando. E sistema aki tin mas di 30 aña den uzo y a conoce desgaste. Tabata imperativo pa Gabinete Mike Eman tuma paso al respecto y percura cu tanto cas como negoshinan di henter e capital por sigui conta cu e servicio sanitario aki.

“Nos ta bezig un par di aña caba restructurando henter e sistema di riool, den e caso aki esun cu ta bin for di Oranjestad cu conexion pa Bubali Plas,” asina Minister Sevinger a bisa. Tin hopi di e tubonan aki cu den transcurso di aña a cay den otro. Den e masterplan di renobacion di Oranjestad, tambe a duna atencion na loke ta bou di e superficie. “E sistema di riolering ta un di e proyectonan principal cual e pomphuis, (banda di Sun Plaza) ta e ader grandi for di unda tur e sistema di riool ta yega pa bay Bubali Plas,” e titular di Infrastructura a splica.

Ta asina cu e pomphuisnan ta cuminsa for di banda di DOW bieu. Nan funcion ta pa pomp e awa bay ariba pa e por sigui riba e tubonan subteraneo, pa medio di gravedad, te ora nan yega Bubali Plas. Dor cu ta algo cu no ta simpel bista diario di nos tur, ta facil pa lubida riba dje y te hasta subestima su importancia. Sin embargo, e mal funcionamento di e sistema aki por ta desastroso pa e area mas pobla di nos pais. “Awe nos ta bahando un di e pomphuisnan di mas grandi cu a wordo prefabrica riba tera y awo nos ta bay bah’e bou tera pa haci e conexionnan cu ta yega Bubali Plas,” e Minister a menciona mientras cu esaki tabata tumando luga.

“E ta hopi importante paso na Oranjestad tin hopi cas cu ta conecta na e sistema di riool. Si esaki no wordo haci, e casnan aki ta gewoon yena cu awa di desperdicio cu tur conscuencia cu esaki por tin. Bo ta bay tin problema tambe cu e pomp cu nos tin na Bubali Plas pasobra e coriente cu mester  no ta yega na e nivel pa e mashinan por draai,” e mandatario a bisa acerca.

Tipo di inversionnan aki por ta no ta aporta na e popularidad di e titular di infrastructura, pero ta e decision mas responsabel. “Ta importante pa bo mantene y expande e sistemanan bou tera cu bo tin. E parti bou tera tin biaha ta mes importante of tin biaha mas importante cu esun riba tera,” Minister Sevinger a bisa. Su ekipo ta evalua tur proyecto y basa riba presupuesto ta dicidi cua ta esun cu ta haya prioridad. Danki na e decision y inversion haci, e ader principal aki lo funciona bon pa e proximo 20 añanan.

Expresionnan haci den e articulo aki no necesariamente ta refleha opinion di ArenaPoliti.co