ORANJESTAD – Diahuebs mainta Minister President Mike Eman a realisa reapertura di rotonde na Driemasterstraat/Santa Helenastraat hunto cu colega Benny Sevinger.  E mandatario ta sumamente contento cu e trabou haci di parti di DOW y contratista local Thiel Corporation, pero tambe pa e habitantenan cu awo lo goza di mas seguridad y bunita infrastructura.

“Pa nos esaki ta otro proyecto cu ta realisa pa haci trafico mas sigur,” asina Premier Eman a comenta. “Pa nos tabata motibo di preocupacion pa hopi aña dor di e cantidad di accidente cu tabata sosode aki y awe cu tin e rotonde ta spera cu trafico lo bay mas lihe, y mas importante mas sigur.” Prome Minister a remarca cu e parti di embeyecemento rond di e proyecto ta un bonus pa e casnan rond di dje den Madiki y Playa Pabou.

E mandatario ta felicita tur cu a traha duro y e tin un aprecio grandi pa e trabou cu a wordo haci. E reapertura a keda realisa dor di su persona y Minister Sevinger di un manera simbolico. Ambos, hunto cu ayudo di algun bisiña a kita e baricadanan pa permiti e trafico cuminsa circula bek.  Asina mes, Premier Eman ta duna credito na pueblo pa e progreso cu Aruba ta conociendo.

“Esaki ta un trabou di e pueblo Arubano cu a pone nos na e posicion pa haci esaki posibel y awe un gratitud na comunidad pa e confiansa pa e bon trabou por continua. Pa nos esey ta e mandato, esta pa traha pa mehora e calidad di bida di e ciudadanonan,” Minister President a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co