Minister Benny Sevinger: Despues di rotonde ta bin di dos fase cu ta mehora caminda entre rotonde di Ponton y Wendy’s
![161215 rotonde4](/cache/klixowatermark/c8c2786f82ff3e223b05736b6cf43835.jpg)
ORANJESTAD – Diamars mainta Minister Benny Sevinger a realisa reapertura di crusada Driemasterstraat/Santa Helenastraat cu awo ta un bunita rotonde. Hunto cu Prome Minister Mike Eman a kita e baricadanan pa laga autonan bolbe transita. Pa e titular di infrastructura ta un satisfaccion grandi pa wak cu otro proyecto cu tabata pendiente pa decadanan largo, ta keda realisa. Tambe ta spera cu e lo sa di sirbi su proposito, esta di brinda mas seguridad den trafico di e area y embeyece e bario pa su hendenan.
“Un proyecto cu pa hopi aña tabata pone den lachi; peticion a bin di bisiña pa hopi aña, di scolnan pa motibo di seguridad pa e muchanan cu ta crusa bay St. Franciscus y Bon Bini,” asina Minister Sevinger a splica. E infrastructura di e rotonde ta inclui walkpad na e skinanan pafo hunto cu baki di mata y tambe verkeersdrempels for di cada direccion. “Nos ta spera cu tur trafico por slow down y laga hende crusa, asina e bicindario ta haya un rust,” Minister Sevinger a bisa.
Tambe a splica cu e rotonde y su infrastructura ta forma parti di Fase 1 ya cu Gabinete Mike Eman tin plan riba mesa pa drecha e caya aki completamente den direccion di Wendys y den direccion di rotonde di ponton. E ultimo aki ta cay bou di proyecto di Ringweg 3/Watty Vos Blvd. E lo keda comberti den un rotonde practicamente nobo y asina conecta cu Santa Helenestraat cu ta bay haya fietspad y area pa hende recrea. E di dos fase aki ta programa pa inicia durante 2017.
“Un proyecto bunita cu mas tin di haber cu seguridad di e bario,” ta opinion di e titular di Infrastructura. A pesar cu e trabounan a haya nan mes stroba dor di awacero, a logra completa pa habri caminda bek cu ta sumamente importante.
Den e proximo dianan ta bin acerca detayenan di mata, etc, pa caba cu nan. Minister Sevinger ta felicita Departamento di Obranan Publico, Thiel Corporation, e pueblo di Madiki y Playa Pabou. “Nos ta spera cu e funcion pa cual el a wordo traha sirbi su proposito di drecha seguridad den trafico y alivia tambe e fluho. Laga nos sigui cu e trabounan,” asina Minister Sevinger a finalisa bisando.
![161215 rotonde benny](/images/2016-Q4/161215-rotonde-benny.jpg)
Expresionnan haci den e articulo aki no necesariamente ta refleha opinion di ArenaPoliti.co