Binnenhof cu Plaza Padu ta den wordo inaugura. 

ORANJESTAD - Mas y mas  e vision di Prome Minister Eman ta birando visibel den tur skina di Aruba, principalmente den Centro di Ciudad cu ta encera varios edificio renoba, restaura, remodela y tambe construccion di parke y otro centronan di encuentro. Na momento cu Gabinete Mike Eman a sinta na 2009, ya caba e plannan, pa entre otro e Centro Historico, tabata cla. Esaki pasobra den oposicion caba a pone atencion riba edificionan cu no tabata mag di a bay perdi. E plannan tabat'ey, mester a pone nan den ehecucion y esey a sosode di inmediato. A reconstrui Bestuurskantoor y e gobierno nobo cu a caba di sinta por a drenta eyden pa cuminsa traha. Un edificio cu tabata na punto di wordo bendi door di e gobierno prome cu Gabinete Mike Eman.

A sigui cu restauracion di e centro Historico. Tur e edificionan den mal estado, entre nan e watertoren, edificio di RekenKamer, cas di Gobernador, stadhuis y mucho mas. A construi Cocolishi dunando realce na e centro di gobernacion y awor ta cuminsa cu e edificio bieu di Havenkantoor. E cambio ta visibel y tur hende ta admiti esaki. Vision di Prome Minister ta haya su perfil. Awor e Binnenhof 'Plasa Padu' ta den keda cla pa pronto wordo inaugura.

Aña pasa tabatin un ceremonia modesto di ‘groundbreaking’ di Plasa Padu. Plasa Padu cu ta wordo traha den un estilo di ‘Binnenhof’ ya ta den keda cla pa asina Aruba henter por gosa di dje. Plasa Padu ta parti di e vision di e actual gobierno pa loke ta renobacion di Centro di Ciudad. E vision aki ta birando un realidad den cada faceta.

Plaza dedica na Padu Lampe

E persona na kende e Plasa ta dedica ta Juan Chabaya Lampe, miho conoci como ‘Padu’ of 'Padu del Caribe'.  Un shon di hende, stima y aprecia pa tur cu conoce. Un persona sumamente talentoso, creativo y inspirativo. Padu ta un di e co-autornan di nos himno nacional, 'Aruba Dushi Tera'. Banda di ta un musico cu a produci cancionnan inolvidabel manera e di e dos himno di Aruba ‘Abo So’, Padu ta tambe un pintor y un autor di bukinan metafisico. Pero mas ainda, Padu ta un luchado di prome ora di nos Status Aparte. E lucha di e humilde pueblo Arubiano na inicio di siglo pasa. Un lucha sagrado, un anhelo grandi, un deseo cu despues di hopi contratiempo a keda realisa na 1986. Mescos ta e amor incondicional cu Aruba henter tin pa Padu, e icono Arubiano, nos tata di cultura. Na momento di ceremonia di groundbreaking di Plasa Padu, Prome Minister Eman a elogia Padu cu e siguiente palabranan. “Ta poco personalidad nos tin na Aruba cu a duna un contribucion na e aspecto politico y e desaroyo constitucional y a duna un contribucion valioso pa eternidad den crea e vinculonan entre nos como ciudadanonan cu e suelonan stima di nos dushi tera Aruba”.

Prome Minister Mike Eman ta un persona berdaderamente orguyoso y contento cu su vision ta birando realidad. Na momento cu algun aña pasa miembronan di Gabinete Mike Eman den oposicion e tempo ey, a para duro pa no bende Bestuurskantoor, tabata pa e vision cu tabatin con ta mira e rol di Bestuurskantoor. Un centro di gobernacion cu ampliacion y su propio plasa, estilo Binnenhof como parti di renobacion di Centro di Ciudad. 

Expresionnan haci den e articulo aki no necesariamente ta refleha opinion di ArenaPoliti.co