Den un entrevista, Parlamentario di Partido MEP, Sr. Guillfred Besaril, a elabora riba riba e situacion di insiguridad cu ta reina riba Aruba y e resultado te na e momentonan aki di e Marcha contra Criminalidad cu a tuma luga riba 13 di october 2016. Sr. Besaril a declara lo siguiente.

"Exactamente un luna pasa un grupo grandi di cuidadano a bini hunto pa un marcha cu den tur trankilidad nos por yame uno "Historico" pa Pais Aruba. Dicon? No pa e cantidad di persona cu a participa, sino mas bien pa e motibo cu a pone e grupo bini hunto y manifesta. Niun ciudadano riba nos pida baranca por a biba soña cu algun dia lo mester a lanta para y laga e voznan rezona pa un tema diferente na por ehempel e situacion economico, di labor, educacion of finanzas publico di Aruba. Realmente e ta dificil na digeri cu tur esaki a tuma luga pa motibo di un aspecto cu semper tabata un punto fuerte di nos isla, esta siguridad.

Tur loke Aruba ta awe como Pais ta grandemente danki na e siguridad cu semper a existi riba nos pida baranca. Un situacion di siguridad cu a conoce cambionan drastico den e ultimo 6 añanan. Esey ta un hecho indiscutibel mas. P'esey e rabia y decepcion serca e gran mayoria den nos comunidad; di e studiante cu ta haña su mes confronta cu ladronicia na su scol of instituto educacional, te na e comerciante cu derepente ta bira victima di atraco of peor hasta perde su bida pa motibo di e circulacion halto y ridiculo di arma di candela cu tin na Aruba.

E pregunta principal cu nos mester haci awe na Gobierno ta: "Awe exactamente un luna despues di e marcha pa nos isla su siguridad, kico a cambia?" Y e respuesta ta .... NADA!

Entre 13 di october y 13 di november 2016, Aruba a conoce un total di 18 caso di ladronicia (registra) di cual 4 di nan riba turista. A registra 8 caso di intento di ladronicia cu un solo detencion como resultado.

Den e periodo aki tabata tin 4 atraco y 2 intento di atraco cu un solo detencion na final. Ademas di e atraconan of intento na esaki, nos comunidad a haña su mes confronta cu no menos cu 5 incidente den cual arma di candela a hunga rol. Danki n'e esfuerzo di Cuerpo Policial a logra 3 detencion durante e sucedidonan aki.

Den e periodo menciona tabata tin 16 caso di sea maltrato y/of menasa. Y e periodo a conta cu dos caso di destruccion. E conteo total di loke a keda registra ta mas o menos 55 caso den cual sea tabata tin arma di candela, violencia, destruccion y/of ladrocia. Pues practicamente 2 caso di e tiponan di incidente analisa pa dia y na tur caminda riba nos isla!

Tabata tin un acuerdo di 3 punto entre e grupo na cabez di e "Marcha contra Criminalidad" y Gobierno encabeza pa sr. Mike Eman. Enbista di e resumen elabora den e articulo aki combina cu echo cu durante e tratamento di e presupuesto di Husticia pa 2017, Gobierno no a entrega ningun nota di cambio pa duna e ministerio e 10 miyon Florin adicional acorda, mi ta conclui cu un biaha mas sr. Mike Eman y e titular actual di Husticia a simplemente tuma e manifestantenan y Pueblo en general haci! Ciudadanonan di Aruba ta cansa di e situacion di Criminalidad y e falta cronico di siguridad. Mientras tanto e situacion ta sigui su curso normal di "High Season" na man di un Gobierno cu tur dia ta gastando e poco credito na credibilidad cu a sobranan den nos comunidad". Parlamentario Besaril a termina. 

Expresionnan haci den e articulo aki no necesariamente ta refleha opinion di ArenaPoliti.co