Oranjestad - Diaranson den parlamento, Minister Bermudez a trata e ley di ‘Hoger Beroep’ cu a keda unanimamente aproba. E ley ta sumamente importante pa Aruba su sistema fiscal tumando na cuenta cu e ta encera un renobacion y modernisacion di e procedura di apelacion.

“Mi ta hopi satisfecho con e reunion aki a bay, hopi al caso y eficiente. Tambe mester tene na cuenta cu e proceduranan aki ta hopi anticua. Esunnan vigente mes ta basa riba leynan di aña 1943, pues awe nos a yega na otro reforma grandi pa loke ta trata e sistema legal di Aruba”, Minister Bermudez a expresa.

Entrante 1 di Januari 2015 lo tin dos instancia na corte pa trata procedura den tereno di impuesto, particularmente apelacion di ‘aanslag’ cu lo por wordo haci mediante “gerecht in eerste aanleg” of tambe “hoger beroep”. Esaki sigur ta un adelanto grandi pa Aruba ya cu e ta ofrece un siguridad den tereno fiscal y tambe ta cumpli cu un derecho sagrado pa nos comunidad.

Durante e reunion publico tambe Minister Bermudez a entrega un nota di cambio basa riba e ‘Griffierecht” pa individuonan. Despues cu e mandatario a constata cu e proposicion aki tabata sosteni pa tur e miembronan di parlamento, e mandatario a dicidi pa entrega e propuesta caminda cu lo  cuminsa cu un tarifa riba mesun nivel cu esun di Landsverordening Administratieve Rechtspraak (LAR). Esey kiermen cu si un persona kier apela den corte pa un of mas “aanslag” (por haci mas cu un den un solo apelacion),  e prome tarifa lo ta 25 florin y si despues ainda ta desea di bay den un di dos tanda den ‘hoge beroep’ e tarifa lo bira 75 florin, pues Minister a igualize na e tarifanan cu ta valido den actualidad pa e procedura di LAR.

Na mes momento Minister Bermudez  a remarca cu un di e amienda nan entrega pa lider di Partido Democracia Real (PDR), Sr. Andin Bikker, “Tata Postizo” di e modernisacion di nos procedura fiscal manera e mandatario a expresa mainta den parlamento a wordo retira, mientras cu e otro cu ta trata e mediacion den tereno fiscal ta uno posibel y aplicabel den futuro.

Expresionnan haci den e articulo aki no necesariamente ta refleha opinion di ArenaPoliti.co