Oranjestad / Miami – Prome Minsiter Mike Eman a participa ayera den e conferencia ‘Future of the Americas’ organisa pa ‘The Clinton Foundation’ cu a tuma luga na Miami. Participacion di Prome Minister Eman den e conferencia tabata un invitacion extendi pa ex-President di Merca Bill Clinton cu ta presidente di e fundacion cu ta organisa e conferencia importante aki. Prome cu e conferencia, Sr. Eman a haci un bishita na Consul-General di Reino Hulandes, staciona na Miami, hunto cu Minister Plenipotenciario na Merca drs. Andy Lee. E reunion a toca diferente temanan di interes pa Aruba. E Consul di Reino na Miami ta duna sosten importante na Aruba den su trabounan na Merca.

Den un entrevista cu e Consul-General di Reino Hulandes, Sra. Nathalie Olijslager-Jaarsma, el a duna un splicacion breve di e contenido di nan reunion. Un di e topiconan importante cu a combersa riba dje ta con Consulado General ta asistiendo Aruba, como parti di Reino Hulandes, cu inversionistanan specialmente interesa den sostenibilidad. Tambe e Consul a splica cu nan ta haciendo trabou pa asisti Aruba como un ‘Hub’ pa Latino America. E idea principal ta pa companianan Americano por establece nan mes na Aruba y haci negoshi cu Continente Latino Americano. Tambe a papia riba un tema di suma importancia pa studiantenan di Aruba cu kier studia, mas serca di Aruba, esta na Florida mes y esaki di un manera mucho mas barata.

Riba e tema di Aruba como ‘Hub’ Sra. Olijslager-Jaarsma a mustra di ta hopi entusiasma cu e tema. E ta haya hopi importante cu por yuda y traha hunto cu Aruba riba e tema aki, pasobra e ta un Consul no unicamente pa Hulanda, si no pa henter Reino y esey ta inclui Aruba.

Banda di e reunion aki, Sra. Olijslager-Jaarsma a splica cu, hunto cu Prome Minister, a reuni tambe cu representante di International Change Management Consultant, Joep van Berkel, cu ta interesa den desaroyo y inversion na San Nicolas. E interes particular aki ta bin debi na e cambionan recien den sistema di impuesto introduci pa Gabinete Mike Eman I cu a haci di San Nicolas un zona economico special pa inversion na Aruba. Na nomber di su  compania y e consorcio cu e ta representa, Sr. Joep van Berkel a entrega un Letter of Intent (L.O.I) durante e reunion pa evaluacion.

Consul General, Sra. Olijslager-Jaarsma a splica cu tin hopi interes pa Aruba y e oportunidadnan cu e por ofrece na comercio Mercicano y e ta ripara esaki na unda cu e bay como representante di Reino Hulandes. Recientemente el a bay representa Reino Hulandes na un mission comercial na Broward cu ta un poco mas noord di Miami y el a haya varios inversionista cu specificamente a pidi pa informacion tocante di Aruba y nan a mustra nan interes pa establece na Aruba pa su posicion interesante como un Hub pa e mercado Latino Americano.

Expresionnan haci den e articulo aki no necesariamente ta refleha opinion di ArenaPoliti.co