Diamars den oranan di atardi e hobencita Surina Chuckaree, un miembro di YMCA San Nicolas, a pone e switch na ‘ON’ den forma simbolico na YMCA San Nicolas pa inaugura nan panelnan solar. Esaki a tuma luga den presencia di Minister di Asuntonan Economico, Comunicacion, Energia y Medio Ambiente ing. Mike de Meza, kende porcierto a crece uzando e facilidadnan di YMCA.

Di e forma aki, YMCA ta sigui den pasonan di e vision di Gabinete Mike Eman II pa Aruba bira “Green” uzando mas tanto posibel energia limpi, entre otro energia di solo, biento y ‘waste to energy’.

E proyecto aki ta forma parti di un serie di proyecto pa mehora e instalacionnan di YMCA y cu a wordo guia door di ‘Aruba Way Foundation’ di Valero. Un proyecto cu den su totalidad a costa rond di 400 mil florin.

A renoba dak di e edificio prome cu a pone e panelnan solar, a drecha e cancha di basketball, mehora sala di computer, a drecha y pone cura nobo, e speeltuin a haya un facelift, y ta sperando solamente pa e wordo yena e siman aki cu santo blanco, cual ta e contribucion di Gobierno na mehoracion di e facilidad aki na San Nicolas.

Na momento di hiba palabra Minister Mike de Meza a recorda cu nostalgia e tempo cu e tabata chikito y a hunga den e facilidadnan di YMCA unda, segun el a conta e publico presente, el a conoce e persona kende awendia ta su casa.

Pero tambe e tabatin masha palabra di elogio pa loke e institucion aki ta haci pa e hobennan di San Nicolas, den e caso aki. E directora, sra. Harms, a conta cu despues di scol rond di 90 mucha ta bini pa haya guia cu nan tareanan di scol y/of pasa nan tempo liber despues di oranan di scol.

Minister de Meza a haya un splicacion for di Ray Buckley, di Aruba Way Foundation, tur e proyectonan realisa cu ayudo di diferente compania local. Y tabatin un grafico cu ta ilustra con e gastonan di coriente a baha basta desde cu a cambia pa un sistema ‘Green’. Sra. Harms a splica e mandatario cu no solamente YMCA San Nicolas tin panelnan solar, pero tur nan sistemanan di airco ta inverter.

E parti di e panel solar ta algo cu e mandatario a keda masha contento ya cu di e forma aki ta sigui e maneho di Gobierno cu ta desea pa e pais aki ta haci uzo di energia limpi enbes di esun tradicional.

Pa loke ta e parti di contribucion di Gobierno, e mandatario a splica cu el a combersa cu su colega di infrastructura, kende a priminti’e cu e siman aki ainda departamento di DOW lo cuminsa basha santo blanco den e speeltuin, manera Gobierno a priminti.

Expresionnan haci den e articulo aki no necesariamente ta refleha opinion di ArenaPoliti.co