Prome Minister Mike Eman y Minister di Asuntonan Economico, Comunicacion, Energia y Medio Ambiete, Minister Mike de Meza, a participa na e ‘Caribbean Energy Security Summit’ riba invitacion di Vice Presidente di Merca, Joe Biden. E cumbre ta wordo organisa pa prome biaha na Washington DC y ta conta cu participacion di jefenan di estado di region di Caribe y representantenan gubernamental di alto nivel, manera finanzas, sector priva y e lidernan di Nacionnan Uni, Caribe y comunidad internacional pa promove un futuro mas limpi y energia mas sostenibel den Caribe.

“Nos ta sumamente honra di a ricibi un invitacion pa participa den e panel ministerial durante e conferencia aki,” Minister de Meza a splica. E topico principal cu ta wordo discuti ta retonan di cambio climatico den region, specialmente con paisnan por traha hunto pa yega un acuerdo global riba cambio climatico.

Aruba ta forma parti di e ’10 Islands Commitment’ di Carbon War Room. E compromiso tin como fin pa comparti cu otro islanan den region loke Carbon War Room a experencia den e caminda cu el a scoge pa cana hunto cu Aruba den logra su meta di bira 100% sostenibel den generacion di awa y coriente. Aña pasa Carbon War Room a presenta e ‘smart growth pathway’, un plan strategico, pa logra e independencia total di fuentenan convencional pa produccion di energia. Ya caba mas isla den region a afilia nan mes na e iniciativa aki,” e mandatario a declara.

Durante e ultimo añanan Gobierno di Aruba a tuma pasonan necesario pa pone nos isla riba e caminda pa sosteniblidad den tur aspecto. ‘’Aruba ta ehempel di sostenibilidad pa region”, Minister Mike de Meza a declara. “Maneho di Gobierno a ser elogia pa Vice Presidente Biden ya usa Aruba como ehempel pa un desaroyo sostenibel. Pa otro aña Aruba lo ta yegando casi 50% di uso di fuentenan alternativo pa produccion di awa y coriente. “E transicion completo pa ta menos dependiente di fuentenan tradicional, como isla chikito, nos no por hasi’e nos so. Ta imperativo pa nos afilia nos mes na plataformanan internacional y sera cooperacionan strategico cu partnernan regional y international,” Mike de Meza a declara.

Expresionnan haci den e articulo aki no necesariamente ta refleha opinion di ArenaPoliti.co