Celebracion di Pasco di Nacemento ta un di e celebracionnan religioso mas grandi cu nos mundo conoce. E ta e celebracion di cu Dios nos Tata a manda su unico Yiu riba e mundo pa nos salbacion. Presencia di Jesus nos Salbador, ta algo cu pa nos tur cu ta kere den Dios, tin un nificacion diferente y personal. Como partido politico nos sa cu tur cos ta sosode segun boluntad Señor Jesus. E ta determina nos caminda den e bida como hende y como pais.

Como representantenan di pueblo, nos sin duda tin un mayor responsabilidad di sembra e convivencia positivo y harmonioso aki den nos pueblo, sin niun distincion o preferencia politico di un persona. Ta asina so nos por sirbi henter nos comunidad di berdad.

Nos por tin diferencia di opinion politico cu otro, diferencia di vision riba maneho di nos pais, pero bou di ningun circunstancia e diferencianan aki mester hiba na dividi pueblo of  na sirbi un parti di pueblo mas of a costo di otro. Pesey ta di lamenta cu e proceso negativo di sembra discordia, di sembra division y contradiccion innecesario a resalta tanto den 2014. E unico meta di esaki tabata pa sirbi interes politico partidista. No pa sirbi interes di nos pais y cada uno di nos ciudadanonan. Sembrando desunion, sembrando panico innecesario den nos pueblo, no ta e manera pa trata di saca bentaha politico y sigur no ora cu e ta bay a costo di integridad di otronan.

Den e dianan special aki caminda nos ta celebra nacemento di Jesus, lo ta na su luga pa tur politico reflecciona riba kico ta nos obligacion como representantenan di pueblo y atende cu esaki den un miho forma, sin ofensa, sin atake of sin motibo of argumento.

Nacemento di Jesus ta trece un luz di speransa y di paz den pueblonan rond mundo. Tambe den nos curason di cada un cu ta kere den Dje y cu ta habri su curason y mente pa paz, husticia y trankilidad pa tur. Ta di spera cu den e aña nobo  nos sigui e ehempel di Jesus Yiu di Dios y trece paz unda tin descordia, trece alegria unda tin tristesa, trece speransa unda esaki a bay perdi, yuda esnan cu mas tin mester, pasobra asina nos ta cumpli cu SU boluntad. Fraccion di AVP ta spera cu e paz y felicidad cu nos sinti den e dianan di Pasco, lo reina den nos casnan y nos pais durante di henter aña 2015. Nos ta desea henter pueblo di Aruba, un BON PASCO y un BON AÑA 2015.

Expresionnan haci den e articulo aki no necesariamente ta refleha opinion di ArenaPoliti.co