Prome Minister Eman a duna splicacion amplio relaciona cu trabounan rond di Aruba. 

ORANJESTAD – Durante un conferencia di prensa dialuna mainta, Prome Minister Mike Eman, den presencia di su colega di Infrastructura Benny Sevinger, y su conseheronan, a duna un presentacion amplio di trabounan di renobacion di Aruba. “Nos kier a duna informacion riba un cantidad di proyecto cu ta bay den ehecucion den e contexto cu Renobacion di Aruba ta bay drenta otro fase,” e mandatario a expresa.

Eman a cuminsa pa splica cu e Gobierno cu e ta lidera durante e ultimo añanan a enfoca riba e calidad di producto Aruba. Tanto riba renobacion centronan di Ciudad como e bario, scol,  infrastructura y espacionan publico. Den e contexto aki un cantidad hopi grandi a wordo haci durante e ultimo añanan pa cual tambe “un palabra di felicitacion na colega Sevinger y Infrateam cu a traha incansablemente pa tur e renobacionnan cu nos ta mira rond di Aruba”.

Di otro banda, Prome Minister Eman a bisa cu fase 3 di renobacionnan aki ta den proceso pa inicia caba cu cierto proyectonan y “awe nos kier a comparti nan cu miembronan di prensa.”  Manera por corda a haci un renobacion impresionante di e area di Village, principalmente na Sint Maartenstraat. Henter e plaza directamente dilanti di Hulpbestuurskantooor na San Nicolas y awor fase 2 y 3 di Village ta bay wordo ehecuta. Esey ta e cayanan cu ta yega un poco mas cerca di Bernhardstraat y tur e cayanan ey tambe ta bay conoce un renobacion manera cu a wak den Sint Maartenstraat y bisindario, unda cu acera, espacio publico, e parti di vegetacion ta bay conoce mehoracion considerabel cu ta hopi importante.

Otro proyecto di renobacion di bario cu ta bay inicia, mescos cu a haci na Juwana Morto, De Vuyst, Village, Yara y Pos Chqiuito, ta esun na Monserat. E renobacionnan fase 1 di e barionan menciona tabata encera di un banda e casnan y e otro parti tabata e infrastructura. Den e caso di Monserat sinembargo mayoria di e casnan ta casnan priva cu e hendenan a cumpra for di FCCA. E casnan ey, Gobierno no tin tanto control riba nan, pero e infrastructura den henter e area residencial di Monserat ta uno cu tambe kier a duna atencion na dje, dune un realse. “Pesey nos ta cuminsa cu e prome fase cu ta henter e caya principal di Monserat, cual ta Semeleerstraat, y cu lo conoce un renobacion impresionante. Banda di e mehoracion di cayanan den Monserat, nos lo bay pone un mini cancha di futbol di yerba pa contribui un poco mas na mehoracion di e calidad di bida,” e mandatario a splica.

Otro proyectonan cu ta den movecion ta MFA Paradera y Savaneta, mientras cu MFA Sta Cruz ta e siguiente cu ta bay pa destaho publico. E tres MFA-nan aki hunto cu esun di Noord, y despues esun di San Nicolas, ta un mehoracion hopi grandi di e servicio pa esnan cu antes tabata bishita e HBK-nan (Oficinanan di Gobierno) pa haci tramitenan necesario. Si mira e espacio di MFA-Noord awor ta realisa con importante e mehoracion aki ta, no unicamente pa esnan cu tabata haya e servicionan for di e HBK-nan, pero tambe pa tur e servicionan cu a bini aserca manera di SIAD, AZV, y clinicanan priva cu ta brinda nan servicio for di e edificionan multifuncional nobo. Bo ta mira cu e servicio na publico, e ambiente, e acceso na computer, ta forma parti di un mehoracion di calidad di bida den barionan manera cu Gabinete Mike Eman a pone como su meta principal for di un principio. “Pa nos esaki ta algo importante, pasobra tanto Fase 1 y 2 di renobacion di barionan, di centro di ciudad, di scolnan y areanan publico a contribui grandemente na mehora calidad di bida di nos hendenan. Nos a haya hopi palabra di gratitud y apoyo pa esaki. Y diahuebs awor nos ta cuminsa cu instalacion di luznan den bario, y diahuebs awor nos lo ta den e prome bario cu e Proyecto di Luz den Bario desde cu e luznan nobo a yega.”  

Gobierno, e mandatario a bisa, ta hopi contento cu e proyectonan aki ta asina leu y ta spera cu denter di poco por anuncia algun otro mas cu ta riba lista manera di barionan di Simeon Antonio, Dakota, Tarabana y otro barionan, y “nos ta spera cu denter di poco e fondonan por wordo aloca pa mas scol tambe wordo drecha.”

Expresionnan haci den e articulo aki no necesariamente ta refleha opinion di ArenaPoliti.co