NO TIN DEAL AINDA! 

Oranjestad -- Ministernan y expertonan di gobierno a brinda informacion na Parlamebto durante un "bijeenkomst" habri pa publico, pero Gobierno no por a presenta ningun documentacion concreto na Parlamento ya cu e dealnan no ta cla ainda. 
Despues di tanto fanfaria na Venezuela, tanto celebracion na San Nicolas y despues di tanto hisamento di bandera Pueblo por a spera cu lo tabata tin un deal concreto pero a resulta cu no ta asina.

SOLAMENTE LINEANAN GRANDI 
Locual Gobierno a duna ta Parlamento ta solamente lineanan grandi di locual nan tin den mente. Pero no por a prueba mada cu documento. Nos ta sigi cuestiona pakiko no ta duna parlamento e documentonan completo pa analisa e acuerdo cu Citgo. 

VALERO 
Tambe nos ta insisti pa sa kiko nan ta negociando cu Valero. MEP ta PRO reapertura di e refineria, pero nos ta critico pasobra bo no por confia AVP. AVP a regala Valero demasiado caba, y awor Valero no por wordo permiti di "walk away" sin carga su responsabilidad riba e claim ambiental. E intentonan di prome minister pa tira culpa atrobe riba gobierno di MEP, ta muestra di su falta di sinceridad pasobra e unico cu a exonera refinerianan den pasado tabata AVP, Henny Eman. 

PDVSA 
Un otro punto cu a resalta tabata e intentonan sobrehumano di Mike Eman pa hasi manera cu pa nan PDVSA no ta existi, y pesey nos kier studia kiko concreto a wordo firma na venezuela. 

EMPLEO PA NOS HENDENAN PROME 
Un tema di preocupacion ta e Trahadornan arubiano no tin garantia cu nan lo por haya trabou. Pesey nos fraccion a pidi reunion publico (OV) pasobra un bijeenkomst ta pa show e ta. Nos MESTER haya e documentonan concerni mas pronto cu ta posibel. E pregunta ta keda ken ta bai haya e cuponan di empleo, pasobra kier bin cu un limite di 20% pa e trahadornan fiho di exterior den e refineria. Pero e limite lo no conta pa contraristanan. Kiermeen eynan lo no tin control debido. Nos ta puntra nos mes dicon no por aplica e regla di 80% pa local y max 20% pa stranjero riba contratistanan tambe. MEP semper tabata na fabor di re-apertura di e refineria pa combati desempleo na Aruba y pa brinda nos hendenan empleo y mihor perspectiva. Awe nos no a haya e sentimento cu Gobierno ta trahando riba esey. Nos a keda cu un sensacion cu Gobierno no ta honesto cu parlamento ni cu pueblo.

Expresionnan haci den e articulo aki no necesariamente ta refleha opinion di ArenaPoliti.co