Durante charla di ITP Caribbean. 

Oranjestad - Diahuebs ultimo Minister di Finanzas, Angel Bermudez a participa den e "Decos Executive Summit" organisa pa ITP Caribbean, mirando cu digitalisacion y modernisacion ta dos aspecto hopi importante pa e mandatario, specificamente ora ta trata di e funcionamento, eficiencia y servicio di e aparato gubernamental.

Durante e atardi informativo Minister Bermudez a duna di conoce cu no tin un distribuidor local y internacional cu no ta cliente di Gobierno, pues no tin un programa cu no ta wordo aplica. "Durante e ultimo dos añanan aki mi a bin constata cu tur Ministerio ta riba nan mes ora ta trata di digitalisacion", e mandatario a bisa.

E mandatario di finanzas a sigui splica cu desde 2004 Gobierno tin un acuerdo maestro cu Decos Hulanda, pa implementa un red digital pa su documentonan. Sin embargo no ta tur departamento ta aplica e sistema aki y den mayoria caso inclusive e usuarionan ta uza esaki solamente pa registra corespondencia.

Minister Bermudez tabata satisfecho pa mira un sala yen y cu invitadonan a mustra nan interes pa digitalisacion di nan departamento como tambe e manera corecto y eficiente pa uza tur e facilidadnan cu "Decos/Join" ta ofrece, cu sigur ta nifica un gran alivio pa tur administrado den nos aparato Gubernamental.

Por ultimo, e mandatario a informa cu entrante 1 di Juli tur departamento cu ta coresponde bou di Ministerio di Finanzas y Organisacion Gubernamental mester aplica e sistema aki y ta spera cu pronto tin mas uniformidad entre e demas departamentonan riba e maneho di e programa aki.

Expresionnan haci den e articulo aki no necesariamente ta refleha opinion di ArenaPoliti.co