Durante 2015, desaroyonan positivo den sector di turismo a sigui aporta na crecemento economico na Aruba. E resultado robusto den e ultimo a mas cu compensa pa e desaroyo debil den consumo y inversion domestico. Tanto consumo priva como consumo publico a mengua, cu e ultimo impacta pa logra e metanan defini den e Ordenansa riba Supervision Financiero Arubano. Mientrastanto, actividadnan di inversion a sigui cu dificultad pa accelera, debi principalmente na retraso den varios proyecto grandi. En general, na 2015 actividad economico tabata debil cu practicamente ningun crecemento.

E promedio annual di e tasa di inflacion a continua su trend di subida gradual durante 2015, despues di un aumento den tarifanan di electricidad na Oktober 2014. E preshonnan di inflacion a wordo parcialmente mitiga pa e bahada den prijsnan di gasoline y e consumo domestico lento (-2,4 porciento) y a alcansa 0,5 porciento riba un promedio annual. 

Apesar di un reduccion den e deficit financiero, manera midi door di Banco Central di Aruba (BCA), te na Afl. 178,2 miyon durante 2015, finansas publico ta keda fragil.Debe di gobierno como porcentahe di GDP tabata relativamente grandi. E debe total di gobierno a crece te na Afl. 3.974.1 miyon na final di 2015, cual ta ekivalente na un ratio di debe na GDP di 82.2 porciento.

E reserva di divisa netto incluyendo diferencianan di revaluacion a sigui subi cu Afl. 322,3 miyon te na Afl. 1.611,0 miyon durante 2015. Nan a permanece na un nivel adecua si bencmark esaki cu e normanan critico usa door di BCA, incluyendo e cantidad di lunanan di pagonan riba e cuenta coriente cu ta cubri door di e reserva di divisa netto.

E desaroyonan positivo den e reserva di divisa a wordo refleha den e resultado di e balansa di pago, cual a registra un surplus di Afl. 342.7 miyon den 2015, compara cu Afl. 42.2 miyon na 2014. E aumento aki a resulta debi na un cambio di un deficit pa un surplus  riba e cuenta coriente, atribui principalmente na un subida di ingresonan for di turismo y un bahada di importacion.

Mientras cu tin indicadornan significante pa un crecemento economico mas fuerte na 2016, esaki lo materialisa solamente si proyectonan di inversion wordo ehecuta manera planea, y actividadnan di turismo keda vigoroso. Riesgonan adicional ta inclui un continuacion den e falta di confiansa di consumidornan y e bahada den consumo resultando for di esaki.

E oportunidad principal pa crecemento ta relata na e posibel reapertura di e refineria como un upgrader di crudo Venezolano. E operacion di e refineria door di Citgo lo mester conduci na inversion substancial y empleo adicional pa prepara e refineria como un upgrader.

E aumento den e nivel general di prijs lo ta modera na 2016. Generalmente, prijs di petroleo ta premira pa keda na nivelnan abou, cual lo limita e presion riba gastonan.

E publicacion completo ta disponibel riba nos website (www.cbaruba.org).

Expresionnan haci den e articulo aki no necesariamente ta refleha opinion di ArenaPoliti.co